Mbledhja e Përgjithshme e Gjykatës së Lartë zgjodhi të hënën më 16 janar 2023 avokaten Holta Zaçaj si anëtare të Gjykatës Kushtetuese, duke përmbyllur sagën e plotësimit të kësaj gjykate që prej fillimit të reformës në drejtësi.
Zaçaj do të zëvendësojë gjyqtaren Vitore Tusha, së cilës i kishte përfunduar mandati që në vitin 2017. Kjo vakancë është shpallur nga Gjykata e Lartë më 16 janar të vitit 2017, por pas dështimit për të përfunduar procedurën, është rishpallur edhe dy herë të tjera në vitet 2021 dhe 2022.
Në garë për këtë vakancë ishte edhe prokurorja e Tiranës, Elsa Miha. Në njoftimin e Gjykatës së Lartë bëhet me dije se kandidatet Zaçaj dhe Miha morën secila nga 6 vota, por fituese u shpall kandidatja e renditur e para nga Këshilli i Emërimeve në Drejtësi.
Këshilli i Emërimeve në Drejtësi, KED njoftoi më 23 dhjetor vlerësimin e dy kandidateve për vendin vakant të Tushes në Gjykatën Kushtetuese, ku në përfundim Zaçaj kishte siguruar 84.72 pikë, ndërsa Miha 82.22 pikë.
Sipas vendimeve për vlerësimin dhe pikëzimin e këtyre kandidateve të publikuara në faqen online të Gjykatë së Lartë, rezulton se dy kandidatet kanë arritur fillimisht rezultatete të përafërta, ku Zaçaj ka siguruar 82.2 pikë, ndërsa Miha me një avantazh të vogël, 82.22 pikë.
E pyetur nga BIRN për këtë situatë, drejtoresha e Marrëdhënieve me Publikun dhe Median, Ida Vodica sqaroi se avokatja Zaçaj ka arritur rezultatin përfundimtar me 84.72 pikë pasi ka konvertuar një diplomë masteri, që është përfshirë në vlerësimin e KED.
Në jetëshkrimin e avokates Holta Zaçaj të publikuar në faqen e internetit të Gjykatës së Lartë, sqarohet se ajo është “avokate e specializuar në të drejtën familjare, mbrojtjen e fëmijëve dhe transaksioneve me pasuri të patundshme”. Po ashtu shënohet se është anëtare e Komitetit për Shërbimet e Mbrojtësit Publik-Divizioni për fëmijët dhe familjen në shtetin e Massachusetss në Shtetet e Bashkuara të Amerikës.
