Katër persona janë vendosur në pranga nga Policia e Shijakut pasi vidhnin automjete, mjete lundruese, banesa e tabakino, kryesisht në Durrës e Tiranë.
Të arrestuarit janë identifikuar si Donald Subashi, Denis Marku, Elvis Muça dhe Artur Lama. Ndërkohë në kërkim është një 49-vjeçar, banues në Tiranë.
“Në kuadër të operacionit u bë kapja dhe arrestimi i shtetasve:
Donald Subashi, 26 vjeç, banues në Marikaj;
Denis Marku, 18 vjeç, banues në Shkodër;
Elvis Muça, 38 vjeç, banues në Mamurras;
Artur Lama, 48 vjeç, banues në Mamurras.
Si dhe u bë shpallja në kërkim dhe vijon puna për kapjen e shtetasit E.Z., 49 vjeç, banues në Tiranë”, informoi sot policia.
Në njoftimin e bluve bëhet me dije se në bazë të hetimeve të kryera u zbardhën vjedhja e një skafi, një tabakinoje dhe dy automjeteve.
“Si rezultat i veprimeve hetimore u bë e mundur zbardhja dhe dokumentimi me prova ligjore i ngjarjeve si më poshtë:
Vjedhja e mjetit lundrues skaf e shtetasit S. K., në Sukth;
Vjedhja në tabakinon e shtetasit R. V., në fshatin Bilalas;
Vjedhja e dy automjeteve e konkretisht furgon dhe kamionçinë, të vjedhura në Mullet Tiranë më datë 13.02.2025”, thuhet më tej në njoftim.
Blutë sekuestruan një skaf, një automjet kamionçinë rrobat e përdorura nga personat e dyshuar në vjedhjen e tabakinos së shtetasit R. V., dhe katër aparate celularë.
Operacioni u kodua “Theft network”.
Materialet procedurale i kaluan Prokurorisë Pranë Gjykatës së Shkallës së Parë Durrës, për veprën penale “Vjedhja” e kryer në bashkëpunim.
