Detaje të reja janë zbardhur në lidhje me ngjarjen e rëndë që ka ndodhur më 11 mars në Kamëz ku një grua është dhunuar dhe hedhur nga kati i tretë nga bashkëjetuesi i saj.
Mësohet se sherri mes çiftit i cili jetonte bashkë që prej vitit 2009 kishte nisur për një mesazh urimi për 8 mars që i kishte mbërritur gruas në telefonin e bashkëjetuesit të saj pasi ajo nuk kishte vetë telefon.
Policia ka dokumentuar fillimisht dëshminë e të dëmtuarës dhe të burrit që qëndronte me të, duke e klasifikuar ngjarjen si aksidentale. Por vajza e gruas i ka treguar policisë se si burri e kishte dhunuar dhe e kishte urdhëruar të thoshte se ishte rrëzuar duke nderë rrobat në tel. Në dëshminë e saj në polici gruaja ka treguar se si nisi sherri me burrin e saj:
“Ai mbylli dyer dhe dritare që mos të na dëgjonin komshinjtë, nisi të më qëllojë me rripin e pantallonave dhe më tha se nuk do dilja e gjallë nga shtëpia. I kërkova ujë pasi nuk po ndihesha mirë, por ai mori gotën me ujë dhe ma hodhi në fytyrë.
Gruaja këtë version ia ka treguar vajzës së saj në një moment që Dilaver Idrizi ishte larguar pasi ai nuk e linte në asnjë moment vetëm nga frika se mund të tregonte të vërtetën. Vajza ka treguar se kur e pyeti të ëmën çfarë kishte ndodhur kishte ndërhyrë bashkëjetuesi i saj duke e urdhëruar, “Mos e pyet se është e lodhur”.
Dyshuese, e bija ka tentuar të sigurojë privatësi me të ëmën, por Idrizi nuk e linte asnjëherë në prani të dikujt tjetër. Pak çaste kanë qenë ato kur gruaja i është rrëfyer për gjithçka ndodhi dhe po ndodhte në spital ku ajo kërcënohej, ndërsa shtoi:
“Pasi më dhunoi e s’më dha ujë, aty kam humbur ndjenjat e s’mbaj mend asgjë,” tha ajo
