Vendimi për t’i hequr shiritin e kapitenit Mauro Ikardit është përfolur se ka qenë i Luçiano Spaletit, i cili shihet të ketë ndjekur këshillën e grupit zikaltër. Megjithatë, një burim i brendshëm i Interit, sipas zërave nga mediat italiane, e përgënjeshtrojnë një rindërtim të tillë: “Nuk ia kërkoi askush”, është rrëfimi, normalisht anonim.
“Ambienti është i ndarë në tri ‘banda’: italianët, amerikano-jugorët dhe sllavët. Raportet e sulmuesit me shokët janë pozitive, përveç Perisiçit, Brozoviçit dhe Handanoviçit. E njëjta gjë nuk mund të thuhet për Spaletin. Polemika me Mauron pasoi ato me Naingolanin dhe Perisiçin. Belgu flitet të ketë menduar rikthimin në Romë, me sjellje të vazhdueshme jo profesionale; ndërsa kroati kërkonte me çdo kusht transferimin në Premier Ligë. Situata lidhur me “Ninxhën” u zgjidh menjëherë, pas gjobës. Ndërsa nga Ivani pati ultimatum: “Ose unë, ose Ikardi”. Nga këtu nisën daljet publike dhe komentet në rrjet të Vanda Narës, që më pas u shndërruan në “autogol”: klubi vendosi t’i heqë argjentinasit shiritin.
SHIRITI – Nga burimi zbulohen detaje të reja: “Ndër të tjera, Ikardi ishte i bezdisur nga tonet që po përdorte Spaleti kur i drejtohej me kritikë skuadrës dhe ka kërkuar t’i zbusë. Edhe pse ekipi vinte nga një fitore, nuk kishte arsye të përdorej histerizmi. Dhe kur Mauros iu hoq shiriti, e përjetoi si poshtërim dhe nisi t’i dërgojë shpesh mesazhe drejtuesve duke nënvizuar se kishte rekordin e 97,5% të stërvitjeve të kryera me përpikëri, si dëshmi e profesionalizmit. Nuk shërbeu për asgjë: Spaleti nuk ndryshoi mendim. Ndërsa klubi, në garë të plotë për kualifikimin në Champions, nuk ka forcën e duhur për të ndërhyrë. Megjithatë, presidenti Stiven Zhang do ishte gati të mirëpriste në grup Ikardin dhe do e mbështeste. Mauro, në krahun tjetër, ka qenë thuajse gati të rikthehet edhe pa shiritin, por ‘vetëm për fanellën’”.
