Hetuesit kanë sekuestruar kamerat e sigururisë së një lokali lukzos, ku drekoi prokurori Arjan Ndoj së bashku me të lënduarit e tjerë, pak para se të kryhej një atentat mbi të.
Deri më tani mendohet se kanë qenë dy makina të cilat kanë ndjekur lëvizjet e prokurorit, derisa ka ndodhur dhe atentati. Njëra prej makinave dyshohet ta ketë ndjekur “këmba- këmbës” prokurorin Ndoj, ndërsa makina tjetër është pikërisht ajo ku kanë qenë dhe dy personat që kanë qëlluar me armë kallashnikov.
Për këtë arsye policia ka sekuestruar pamjet e lokalit ku ka drekuar prokurori, në mënyrë që të mund të gjejnë makinën që ndiqte hapat e Ndojit, përpara se ky i fundit të shkonte në autostradë, pikërisht në vendin ku iu bë dhe atentati.
Ndërkohë që forcat e ndërhyrjes së shpejtë i janë drejtuar Durrësit në aksion me makina të blinduara. Zona ku ndodhi krimi vijon të jetë e rrethuar, ndërsa deri më tani 10 persona janë shoqëruar për ngjarjen.
Pak orë pas atentatit të dështuar, policia arriti të gjejë një makinë disa kilometra më tutje. Në të kishte dy maska si dhe dy automatikë kallashnikov, të dyshuar se i përkasin autorëve që kanë tentuar të vrasin prokurorin.
Arjan Ndoj prej disa kohësh ka qenë objekt i një sërë sulmesh politike nga ana e kryeministrit dhe zyrtarëve të tjerë të lartë, i akuzuar si person që ka lidhje me botën e krimit. Në makinë me të këtë të premte të atentatit, përveçse shoferit të tij ishte dhe një person i njohur me precedent penal, shtetasi Landi Muharremi.
