Kryeministri Edi Rama gjatë një takimi me qytetarët në Njësinë 1 në Tiranë ka sulmuar kryedemokratin Lulzim Basha për premtimet e këtij të fundit gjatë fushatës elektorale.
Ai e ka krahasuar Bashën me Rrapush Xhaferrin e firmave piramidale, i cili premtonte lekë, teksa tha se Basha premton se do u japë qytetarëve mijëra euro sa të dalin nga barku i nënës, por në të vërtetë do u japë vetëm dy gishtat në sy.
Rama u shpreh se Partia Socialiste premton punë, sepse kur ke një punë, atëherë vijnë edhe lekët.
“Nuk është e vështirë për ta kujtuar kohën kur ishte një Xhaferr me makina me bori, me njerëz që e shoqëronin karvan karvan, dhe e prisnin me këngë, dhe thoshte lekë, lekë. Xhaferri thoshte më jep 1, t’ju jap 2. Luli i thotë më jep 1 votë, të të jap kaq lekë. T’ju jap e shtëpi kur të martoheni, mijëra euro sapo dilni nga barku i nënës.
Nuk iu jep jo lekë, por ju jep mbrapsht dy gishtat në të dy bebet e syrit. Kush premton punë, jo duke thënë do iu jap punë e vetë duke fjetur gjumë, por duke punuar pa pushim. Atëhere kur ke një punë, vjen lekë. Kur shkon pas premtimit të lekëve, jo punë s’ke. Shqiptarët kanë gabuar disa herë, kur janë ndjerë të lodhur, rraskapitur, janë ndjerë në atë rrugën, ka Haxhi Qamilin, kap një rrugë, të dalë ku të dali”, tha Rama.
