Krimi në Shqipëri, ka bërë që të shtrihet në forma të ndryshme. Gazetarja e kronikës, Klodiana Lala, teksa numëronte krimet e fundit në vend, tha se ai është bërë shumë radikal, duke dashur të përçojnë mesazhe te qytetarët.
Lala shpjegoi gjithashtu, se cilat janë bandat kryesore që operojnë në Shqipëri. Sipas saj, Tirana, Durrësi dhe Elbasani janë tre qytetet ku krimi është më i madh dhe mbizotërojnë bandat.
Lala është shprehur se hedhja në erë e Aleksandër Sadikaj pak ditë më parë me tritol, në afërsi të rrethrrotullimit në hyrje të autostradës Tiranë-Elbasan, ka qenë një mesazh i botës së krimit, për të treguar brutalitetin e tyre.
“Ngjarja më e fundit është atentati mafioz i Aleksandër Sadikaj. Një personazh edhe i panjohur për policinë, kishte qenë emigrant në Greqi. Në automjetin e tij është përdorur rreth gjysmë kg tritol. Është e rëndë sepse ka ndodhur në një rrethrrotullim që ka qarkullim shumë të madh dhe ngjarja ka krijuar shumë panik dhe pasiguri. Krimi është bërë shumë radikal, shumë i ashpër. Ata që e kanë ekzekutuar kanë treguar shumë mllef dhe kanë përçuar mesazh. Është krijuar një klimë terrori te qytetarët.
Një ngjarje tjetër që duhet ndarë ka qenë atentati me eksploziv ndaj Preng Gjinit, afro një vit e gjysmë më parë. Ai arriti të mbijetojë. Ishte përplasje mes dy fiseve, Gjini dhe Reçi.
Një tjetër ngjarje, që ka patur përgatitje shumë të madhe, Mond Cekiçi. Nga mënyra si është ekzekutuar.
Kemi disa qytete problematike, Tirana mban vendin e parë sepse ndërthur shumë interesa. Elbasani ka patur kohët e fundit një seri ngjarjesh.
Durrësi ka një kriminalitet të shtuar. Ka patur atentate mafioze. Më i fundit ishte vrasje e një personazhi me nofkën Maneci. Është mbyllur goja e një prej njerëzve që mund të jepte të dhëna për shumë ngjarje, që nga vrasja e Skerdilajd Konomit.
Një tjetër ngjarje, atentati me snajper ndaj Ardian Capjes. Ai ishte në kulmin e luftës politike, pati atentat në distancë.
Kemi edhe atentatet në Nikël. Kemi patur Mariglen Hakën. Është qëlluar me 100 plumba. Mbijetoi dhe për fat të keq u vra halla e tij, Shpresa Basha, një viktimë totalisht kolaterale. I mbijetoi një atentati të dytë pak ditë më parë në Nikël.
Në Fier, është Demir Backa. E kam konsideruar vrasjen e tij, si një çekuilibrim të botës së krimit.
Rasti i fundit, Bardhok Pllanaj. Mbështeste politikën, një kandidat të LSI. Kishte qenë ekuilibrues mes grupeve në Shkodër. Vrasja e tij ka hapur një kalvar hakmarrjesh. Mendohet se të gjithë zanafillën e ka në Nikël.
Kemi në Elbasan disa grupe tradicionale. Grupi Capja i njohur historikisht. Kundërshtarët e tij, grupi ku merr pjesë edhe Suel Çela.
Në Elbasan kohët e fundit, dolën në pah dy grupe të reja. Grupi Alibej që ka qenë shumë radikalë dhe grupi Copja, me bazë në Dubai, kundërshtarët e tyre.
Në Tiranë, janë aq të ndërthurur, janë me palë politike. Për shumë grupe, jam në pamundësi për të folur. Kam të dhëna që operojnë, por nuk ka dokument zyrtar që të më mbrojë ligjërisht.
Me cfarë kam parë, janë 3-4 personazhe të botës së krimi edhe brenda burgjeve, që po shtrijnë influencën në tendera dhe koncesione.
Në Durrës kemi patur grupin e Lulzim Berishës, të Plarent Dervishës, grupi i atij që njihet si Rrumi.
Kemi grupin Avdylaj me ndikim politik, shitblerje votash.
Po të shkojmë në Nikël, Kemi Durim Bamin, më herët Enver Stafukën, Mariglen Hakën.
Vlora, ata që janë krerët e grupeve nuk rrinë në Vlorë, por në Spanjë dhe në Amerikën Latine”, tha Lala në emisionin “Të Paekspozuarit”.
Ndërsa sa i takon dëshmive të Dumanit, Lala tha se ai është vetëm maja e ajsbergut, pasi ka shumë emra dhe personazhe të tjerë.
“Dumani na dëshmoi se nëse më përpara një grup kriminal kishte një krah të djathtë të armatosur, Dumani na tregoi se grupe kriminale kishin pajtuar një skuadër vrasësish dhe e kalonin sa tek njëri dhe tjetri. Na tregoi gjithashtu që bënin vrasje dhe shkatërronin makinat në servise.
Na tregoi që për të eliminuar kundërshtarët, Martinaj për shembull, për vrasjen e Indrit Dokles, i kishte dhënë Dumanit 500 mijë euro.
Nuredin Dumani është vetëm maja e ajsbergut. Ka shumë emra, shumë personazhe…” u shpreh gazetarja.
