Para se të martoheni, fillimisht duhet të merrni shumë vendime, duke filluar nga ngjyrat e luleve e deri te restoranti ku do ta mbani dasmën.
Por edhe pas ditës së dasmës do të ballafaqoheni me vendime të mëdha – si p.sh., a duhet ta ndryshoni mbiemrin?
Sipas statistikave, mes 60 dhe 80 për qind të nuseve e marrin mbiemrin e burrit kur martohen, ndërsa 20 për qind e mbajnë mbiemrin e vajzërisë.
Por a është mbiemri i ri i duhuri për ju?
Avantazhet e të marrit mbiemrin e burrit
Jeni duke konsideruar ta merrni mbiemrin e burrit? Atëherë shikoni arsyet që e mbështesin këtë ide:
1. Të pasurit të njëjtin mbiemër në familje i bën gjërat më të thjeshta, e veçanërisht kur bëheni me fëmijë. Kësisoj ju do t’i keni procedurat më të lehta kur shkoni në udhëtime, kur merreni me çështjet e shkollimit, por edhe bashkëbisedimi me prindërit tjerë është më i lehtë kur njiheni si familje me të njëjtin mbiemër.
2. Nëse për çfarëdo arsye nuk ju pëlqen mbiemri juaj, atëherë mund ta merrni atë të burrit.
3. Shumica e femrave thonë se të pasurit të njëjtin mbiemër me burrin i ndihmon ato të ndihen si një familje e vërtetë dhe se ndryshimi i mbiemrit është simbol i rëndësishëm dhe zyrtar i angazhimit në lidhje.
4. Qoftë nëse e keni ndryshuar mbiemrin apo jo, shumica e njerëzve do të supozojnë se e keni mbiemrin e burrit dhe rrjedhimisht do t’iu thërrasin p.sh. “zonja Jones…”, qoftë se a ju pëlqen apo jo.
Disavantazhet e të marrit mbiemrin e partnerit
New York Times raporton se 20 për qind e femrave e mbajnë mbiemrin e vajzërisë pas martesës.
Kjo është lista e arsyeve që mund t’ju bindë ta rrisni atë përqindje:
1. Jeni duke u martuar, e jo duke u bërë person tjetër. Ndryshimi i mbiemrit mund t’ju bëjë të ndiheni sikurse e keni humbur veten apo identitetin tuaj, prandaj ndoshta nuk duhet ta ndërroni mbiemrin.
2. Ndërrimi i mbiemrit mund të jetë kundër politikave tuaja
3. Nëse jeni anëtari i fundit në familje me mbiemrin tuaj, ndoshta keni dëshirë ta mbani mbiemrin
4. Nëse mbiemri juaj është unik, interesant apo i lehtë dhe i partnerit është më i zorshëm apo më famëkeq, atëherë më mirë ta mbani mbiemrin me të cilin keni lindur
5. Nëse jeni person i njohur në fushën tuaj, është vështirë ta rikrijoni një reputacion me mbiemër tjetër.
Opsionet tjera
1. Mbani dy mbiemrat – ndonjëherë femra i merr dy mbiemrat, e dhëndri e mban vetëm mbiemrin e vet. Disa herë tjera të dy i marrin mbiemrat e njëri-tjetrit. Ju mund ta diskutoni edhe këtë.
2. Mbajeni mbiemrin e vajzërisë si mbiemër të mesëm. Këtë mënyrë mund të zgjedhni që ndonjëherë ta shkruani p.sh. “Amanda Smith Jones” e ndonjëherë vetëm “Amanda Jones”, varësisht nga rrethanat
3. Konsideroni ta ndryshoni mbiemrin vetëm ligjërisht në mënyrë që kur udhëtoni me fëmijët, apo kur merreni me procedurat shkollore dhe çështjet tjera personale, t’i keni procedurat më të lehta. Por prapëseprapë mund ta përdorni vetëm mbiemrin e vajzërisë profesionalisht.
Nuk ka rëndësi se cilën nga tërë këto opsione e zgjedhni, mjafton ta dëgjoni zemrën tuaj dhe ta merrni vendimin që më së miri i përshtatet situatës tuaj personale.
