Pas 29 ditësh që rezultonte i zhdukur, është gjetur trupi i pajetë i 30-vjeçarit Jurgen Karaj nga fshati Fullqet i Klosit. Trupi është gjetur rreth 30 kilometra larg vendit ku ndodhi aksidenti.
Jurgen Karaj ndodhej në makinë së bashku me shokun e tij, Andi Losha, kur mjeti u aksidentua dhe përfundoi në përroin në fshatin Darsë të Klosit. Që prej asaj dite, 30-vjeçari rezultonte i zhdukur, ndërsa vijuan kërkimet nga autoritetet dhe familjarët.
Në një deklaratë për gazetarin e News24, Enver Doçi, vëllai i të riut, Endri Karaj, falënderoi të gjithë trupat e përfshirë në gjetjen e trupit të pajetë të 30-vjeçarit.
“Dua të falënderoj të gjithë ata që ndihmuan në gjetjen e vëllait tim. Falenderoj Forcat e Kosovës dhe ata të Shqipërisë që na ndihmuan”, tha ai.
Më herët, kur vëllai ishte ende i zhdukur, Endri Karaj kishte bërë apel për gjetjen e tij.
“Kërkoj të më gjejnë vëllanë e të ma sjellin në shtëpi, ngjarjen e zbardh policia, dua nga shteti të më gjejë vëllanë të ma sjellë në shtëpi. Ta varros ta di ku e kam. Kemi kërkuar por deri tani nuk ka pasur asnjë rezultat. Është 9 ditë sot që nuk kemi asnjë shenjë prej tij. Nuk dihet fati i tij. I bëj thirrje kryeministrit që të kemi më shumë forca për ta kërkuar”, shprehej ai.
