Tre persona janë arrestuar në Krujë pasi iu zbuluan ambiente ku kultivohej kanabis. Në kuadër të operacionit të monitorimit, 2 dronë dhe 50 policë u angazhuan në Krujë për kontrollin e territorit.
Në Thumanë u zbuluan 3 ambiente ku ishte kultivuar kanabis në afërsi të dy të rinjve të cilët janë arrestuar.
Po ashtu dhe në Kameras një 31- vjeçar kultivonte kanabis në oborrin e shtëpisë dhe u arrestua nga Policia
NJOFTIMI NGA POLICIA
Krujë
Vijon kontrolli masiv i territorit, për parandalimin, evidentimin dhe goditjen e veprimtarisë kriminale në fushën e narkotikëve.
Arrestohen në flagrancë 3 shtetas, për veprën penale “Kultivim i bimëve narkotike”.
Gjatë kontrollit janë angazhuar 50 forca policie dhe 2 dronë.
Shërbimet e Komisariatit të Policisë Krujë, në vijim të kontrollit masiv të territorit, për parandalimin dhe goditjen e kultivimit të bimëve narkotike dhe kapjen e personave përgjegjës, arrestuan në flagrancë shtetasit:
B.Z., 26 vjeç dhe S. Z., 21 vjeç, banues në Thumanë, Krujë, pasi gjatë kontrollit në afërsi të banesave të këtyre shtetasve janë konstatuar 3 ambiente ku ishin kultivuar bimë narkotike cannabis sativa.
Gjithashtu u arrestua shtetasi R. B., 31 vjeç, banues në fshatin Kameras, Krujë, pasi gjatë kontrollit në oborrin e banesës së tij u gjetën të kultivuara disa bimë narkotike cannabis sativa.
Materialet i kaluan Prokurorisë së Rrethit Gjyqësor Krujë, për veprime të mëtejshme.
