Mes protestuesve që hynë të mërkurën më dhunë në ndërtesën e Kongresit Amerikan, për të penguar certifikimin e demokratit Joe Biden në krye të Shtëpisë së Bardhë, ishte dhe një shqiptar.
Ai është John Alite, mbështetës i zjarrtë i Donald Trump-it, ish-pjesëtar i familjes Gambino në vitet 80-90, dhe ish-krahu i djathtë i John Gott-it. Në vitet 2000, Alite me origjinë shqiptare mori arratinë, kur mësoi se ata që i konsideronte pjesë të familjes, kishin vënë një çmim për kokën e tij. U kap në Brazil, në vitin 2004 dhe bëri një pakt me qeverinë e Shteteve të Bashkuara të Amerikës.
Pas disa vitesh, dëshmoi kundër kryemafiozit të grupit Gambino, e disa gangsterëve të tjerë. Alite u shfaq në krah të protestuesve të tjerë me një triko të kuqe, në të cilën ishte stampuar shqiponja me dy kokë. Qindra vetë sulmuan ambientet e brendshme të Kongresit Amerikan, pasi nuk pajtoheshin me zyrtarizimin e Biden-it në krye të shtetit.
Certifikimi i votave të Kolegjit Elektoral nga ana e Kongresit Amerikan është hapi i fundit në procesin zgjedhor, para inaugurimit të presidenti të zgjedhur dhe zëvëndespresidentes, Kamala Harris, në 20 janar.
Ditën e sotme Alite ishte në një lidhje të drejtpërdrejtë me emisionin “Shqipëria Live”, ku tregoi se ishte një nga personat që ka nxitur këtë protestë. Ai tha se ka bërë thirrje për protestë paqësore.
Alite shtoi se në këtë protestë kanë qenë mijëra shqiptarë. “Flamurin shqiptar e mora pasi kush më mirë se shqiptarët e njohin regjimin komunist, të cilin Joe Biden dëshiron ta vendos në Amerikë. Shqiptarët do ndihmojnë që të mos lejohet vendosja e komunizmit në SHBA”, tha ai.
Alite hedh akuza të rënda për presidentin e zgjedhur, Joe Biden, duke thënë se është i korruptuar dhe se do që të vendosë në Amerikë sistemin komunist dhe socialist.