Gjykata e Krimeve të Rënda caktoi dje masat e sigurimit personal për dy anëtarët e grupit Habilaj, që u arrestuan në Vlorë gjatë operacionit Banda e Babicës.
Ndaj tij është vendosur masa e sigurisë 20 ditë burg, ndërsa Armando Koçerri është lënë në burg pa afat, pasi në banesën e tij, në Babicë të Vogël, u gjetën 4 tonë drogë. Gjykata e Krimeve të Rënda nuk është bindur plotësisht mbi provat e Prokurorisë që ka marrë nga autoritetet italiane sa i takon organizatës kriminale të trafikut ndërkombëtar të narkotikëve, e quajtur tashmë dosja Habilaj.
Kjo vërtetohet nga vendimi i gjyqtares Liljana Baku, e cila ka vendosur vetëm 20 ditë burg si masë sigurimi ndaj Nezar Seitit, i cili, sipas Prokurorisë së Krimeve të Rënda, është pjesë e grupit të narkotrafikut të Habilajve, në bazë të hetimeve dhe përgjimeve të kryera nga autoritetet italiane.
Por mënyra e marrjes së materialeve që implikojnë Seitin dhe paraqitja e tyre para Gjykatës së Krimeve të Rënda nuk kanë qenë bindëse, duke i lënë 20 ditë kohë Prokurorisë që të vërtetojë me prova, siç e parashikon ligji, implikimin e Nezar Seitit. Gjykata vendosi pa asnjë bazë masën e sigurisë 20 ditë burg, pasi provat e Prokurorisë ishin marrë dhe paraqitur në mënyrë të gabuar, jo siç e parashikon ligji, tha avokati i Seitit, Detar Hysi.
KERKESA E PROKURORISE
Prokuroria e Krimeve të Rënda kërkoi caktimin e masës së sigurisë arrest me burg për shtetasit Armando Koçerri dhe Nezar Seiti, të dyshuar për kryerjen e veprave penale të trafikimit të lëndëve narkotike, të kryer në bashkëpunim, në formën e grupit të strukturuar kriminal.
Këta dy persona janë arrestuar në kuadër të hetimeve që po zhvillon Prokuroria ndaj një grupi të strukturuar kriminal, të njohur si Habilaj. I dyshuari Koçerri u arrestua në flagrancë, pasi, në vijim të hetimeve të Prokurorisë, në shtëpinë e tij, në Babicë të Vlorës, u gjetën rreth 4 tonë lëndë narkotike kanabis sativa, në gjendje të tharë dhe gati për trafikim. Ndërsa i dyshuari Seiti u ndalua me urdhër të Prokurorisë.
Ai ka qenë nën hetim, në kuadër të një procedimi penal që po kryej pranë kësaj Prokurorie. Por deri në momentin e ndalimit të tij, nuk ishin siguruar prova të plota në ngarkim të tij nga hetimet e kryera në territorin shqiptar.
Ndërkohë, provat e mjaftueshme për të siguruar ndalimin e tij u siguruan në bashkëpunim me autoritetet italiane, të cilat organizuan disa ditë më parë, në Itali, një operacion kundër disa anëtarëve të tjerë të këtij grupi kriminal.
Në vijim të komunikimit me autoritetet italiane, Prokuroria për Krime të Rënda siguroi të dhënat e mjaftueshme në ngarkim të tij dhe urdhëroi ndalimin, i cili u realizua nga ana e Policisë Gjyqësore
