Nezer Seiti, i dyshuar si financier i grupit kriminal “Habilaj” u ekstradua drejt Italisë ku do të përballet me drejtësinë e këtij shteti.
Në orët e para të mëngjesit, forca të shumta policie e shoqëruan vlonjatin nga ambientet e burgut “Jordan Misja” drejt Aeroportit të Rinasit.
I dyshuari u shoqërua prej tyre deri në bordin e avionit dhe aty u la në duart e dy oficerëve italianë të Interpolit, që kishin mbërritur në vendin tonë një ditë më parë.
Vendimi për lejimin e ekstradimit u mor në dhjetor të vitit të kaluar nga gjykata e Tiranës, sipas kërkesës së prokurorisë dhe me pelqimin e vetë të dyshuarit. Ndaj Seitit gjykata e Catanias kishte firmosur masën e sigurisë “arrest me burg” në mungesë, me dyshimin për trafik narkotikësh në kuadër të grupit të struktuar kriminal.
Pasi vendimi mori formë të prerë, çështja kaloi në duart e Ministres së Drejtësisë, si hallka e fundit që vendos për fatin e të kërkuarit.
Burimet thanë se pasi shqyrtoi dosjen, Gjonaj hodhi firmën dhe brenda pak ditësh i dyshuari iu dorëzua autoriteteve të shtetit fqinj.
Ekstradimi i vlonjatit, vjen në një kohë që ndaj tij ka një masë sigurie “arrest me burg”, në kuadër të hetimeve të çelura nga Prokuroria për Krime të Rënda, për ish-ministrin e Brendshëm Saimir Tahiri.
Pak ditë më parë, prokurorët kësaj dosje firmosën për zgjatjen e afateve të hetimit edhe për tre muaj të tjerë, vendim që i është komunikuar këtë të enjte avokatit të Seitit.
Dorëzimi i beftë i vlonjatit tij tek autoritetet italiane, ngre jo pak dyshime.
Prokuroria e Catanias e cilëson Nezar Seitin, si një person kyç që ka dijeni mbi shtrirjen dhe funksionimin e grupit kriminal “Habilaj”.
Përgjatë katër muajve që qëndroi i paraburgosur në vendin tonë, Nezar Seiti e kyçi gojën për hetuesit shqiptarë, por nuk dihet nëse do të veprojë njësoj përpara prokurorëve në Itali.
Nezar Seiti që konsiderohet si një nga njerëzit më të besuar të Moisi Habilajt, u arrestua në Babicë të Vlorës më 19 Tetor të vitit të kaluar gjatë një operacioni antidrogë ku u sekuestruan rreth 4 ton kanabis.