Prokuroria e Sarandës ka zbuluar të tjera detaje në lidhje sekuestrimin e 35 kilogramë marijuane tre javë më parë në Konispol.
“Panorama.al” ka siguruar një pjesë nga dosja e Prokurorisë, për shtetasin Lutfi Faslliu, i cili u arrestua bashke me gruan e tij. Në dosje thuhet se ky person gjatë zhvillimit të aktivitetit të tij ka shkëmbyer mesazhe në WhatsApp dhe Messenger drejt disa numrave të ndryshëm shqiptarë ose grekë.
Në përmbajtje të këtyre bisedave ka qenë trafiku dhe transporti i drogës drejt Greqisë.
“Është bërë këqyrja e telefonit tip “Samsung” celular që i përket shtetasit Lutfi Faslliu ne dt.07.10.2021, nga ku kanë rezultuar të dhëna me interes për hetimin, konkretisht mesazhe të dërguara në rrjetet e komunikimit në aplikacionet WhatsApp dhe Messenger drejt disa numrave të ndryshëm shqiptarë ose grekë, ku në përmbajtje të bisedave evidentohet qartë fakti i transportimit të lëndës narkotike drejt shtetit grek. Në vijim, është disponuar kryerja e aktit të ekspertimit teknik-kompjuterik në lidhje me telefonin e sekuestruar të këtij shtetasi, me qëllim zbulimin e më shumë të dhënave të cilat eventualisht mund të jenë fshirë nga i dyshuari”, thotë Prokuroria.
Lutfi Faslliu u arrestua bashkë me gruan e tij, Shano në fillim të muajit tetor. Ata u zbuluan se merreshin me trafik droge, gjatë një aksioni ku u kapën duke transportuar dy klandestinë nga Egjipti. Por gjatë kontrollit të kryer në banesën e tyre, policia gjeti dhe sekuestroi 1 Kallashnikov dhe 35 kg marijuane.
