Pasi iu bashkua Interit për 75 milionë euro verën e kaluar, Romelu Lukaku nuk ka humbur kohë për të hyrë në zemrat e tifozëve. U kërkua me ngulm nga trajneri Antonio Konte si zëvendësues i Mauro Ikardit, për të cilin, pas ngjarjeve të vitit të kaluar, tani mendohet se nuk ka më vend në Milanon interiste.
Bomberi argjentinas la një trashëgimi të vështirë pas vetes, si sulmues që garantonte së paku 20 gola në sezon. “E patë përse vlen aq?”, u shpreh disa javë më parë Konte duke iu referuar belgut pas paraqitjes pozitive të radhës.
RONALDO, IKARDI & CO – Thamë Ikardi? Lukakut i është dashur shumë pak kohë për ta lënë në hije kujtimin e Mauros. Dhe “Big Rom” nuk ka humbur kohë, duke realizuar 21 gola në 30 ndeshje (17 prej të cilëve në kampionat), madje si më i shpejti që arrin kuotën në historinë zikaltër, duke lënë prapa tij yje të historisë së klubit, si Ronaldo, Adriano apo Krespo. 26-vjeçari nuk e ka lënë me kaq: në derbin e fituar 4-2 kundër Milanit firmosi pikërisht këtë rekord.
DUELI ME IBRËN – Kështu, derbin e fiton Lukaku, për herën e dytë radhazi. Në sfidën mes “titanëve” me Zlatan Ibrahimoviçin belgu doli në skenë veçanërisht në pjesën e dytë kur Interi ktheu ndeshjen. Në krahun tjetër suedezi rezultoi vendimtar me një gol dhe një asist në pjesën e parë kur u mbështet edhe nga loja korale e shokëve të skuadrës. Në duelin mes Lukakut dhe Ibrës statistikat ndahen në mes, sepse nga fillimi i dyti ishte më i përfshirë.
Zlatan, pavarësisht shqetësimeve në pulpë gjatë javës, arriti megjithatë t’ua ndërlikonte i vetëm jetën mbrojtësve zikaltër. Mori pjesë në manovër duke u tërhequr shpesh në mesfushë për të nisur aksionin, por mbi të gjitha ishte protagonist në dy golat e kuqezinjve. Dy goditje dhe një gol për Romelun, katër për të njëjtën shifër për Zlatanin. Suedezi luajti më shumë herë topin dhe u ngushëllua me një rekord: në moshën 38 vjeç e 129 ditë është goleadori më i moshuar në historinë e derbit të Milanos të luajtur në Serinë A. Bëhet fjalë për golin e tij të dytë në kampionat nga momenti i rikthimit, i treti në Itali nëse konsiderohet edhe goli në Kupën e Italisë.
Por, mbi të gjitha, rrjeta e shtatë kundër Interit në absolut, një nga viktimat e preferuara të Ibrës. Ndërsa Lukaku vuajti mungesën e aksioneve të zikaltërve në pjesën e parë. Pas pushimit, megjithatë, “muzika” ndryshoi menjëherë. Dhe fundi ishte i gjithi për belgun dhe skuadrën e Kontes që arritën të siguronin derbin pikërisht me golin e Romelut. “Ka një mbret të ri në qytet”, do të shkruante në rrjetet sociale belgu pas fitores.
