Dy ditë më parë, Partia Demokratike organizoi një protest kundër ndërtimit të shkollës së re në Kodër-Kamëz. Në krye të protestës dhe organizator i saj ishte Jamarbër Malltezi, dhëndri i ish kryeministrit Sali Berisha, si dhe ish deputetë të PD, të cilët u shprehën ashpër kundër ndërtimit të kësaj shkolle, që do t’iu shërbejë qindra fëmijëve të asaj zone, me pretendimin se prek hapësirat e Universitetit Bujqësor të Tiranës.
Por, pavarësisht se PD-ja proteston sot, ndërtimi i shkollës së re në Kodër-Kamëz daton që në vitin 2013, në Planin Urbanistik të Bashkisë së Tiranës hartuar nga Lulzim Basha, dikur kryetar bashkie, e sot kryetar i PD-së. Madje, jo vetëm kaq, por shkolla parashikohej të ndërtohej pikërisht në të njëjtin vend ku sot PD-ja proteston kundër ndërimit të saj.
Por, më i çuditshëm është fakti se Plani Urbanistik i vitit 2013 i Bashës ka marrë më parë pëlqimin dhe miratimin e vetë Jamarbër Malltezit, i cili ka bërë vlerësimin e ndikimit mjedisor të atij plani. Pra, dhëndri i Berishës, në vitin 2013 jepte OK-in për ndërtimin e shkollës në të njëjtin vend në Kodër-Kamëz, kurse sot e kundërshton këtë projekt, të firmosur po nga ai vetë, disa vite më parë.
Në dokumentin e firmosur nga Malltezi thuhet shprehimisht se: “Për shkak të variabilitetit të çmimeve vërehet se familjet e reja, përgjithësisht, tentojnë të vendosen në periferi dhe/ose në Komunat ngjitur si Farkë, Dajt, Kashar dhe Kodër Kamëz gjë që kërkon përmirësime të rëndësishme infrastrukturore në to, më shumë energji, ujë, rrugë, shkolla, kopshte”.
