Një ditë më parë në media, arkitekti restaurator Reshat Gega kontestonte restaurimin e Kishës së Apostujve në Hoshtevë të Zagorisë duke e konsideruar të gabuar teknikën e restaurimit.
Sipas tij ekziston një listë e gjerë monumentesh që thjesht “zbukurohen” me një estetikë fallco që nuk ka lidhje me ruajtjen e vlerave.
Sulmi i Gegës ndaj punës së Ministrisë së Kulturës nuk është i pari në llojin e tij dhe se beteja e vërtetë e Gegës nuk është për mbrojtjen e trashëgimisë kulturore, por për inate tërësisht personale me Ministrinë e Kulturës.
Reshat Gega që sot flet për mbrotjen e vlerave të trashëgimisë kulturore, është një personazh i përfshirë në të kaluarën, në operacione restaurimi masive me fondet publike për trashëgiminë kulturore. Në vitet 2007-2009 kompania “Gen-Red” ka qenë fitues i tenderave me një fond prej 1 milion USD, për ndërhyrje në monumentet e kultures dhe në Pazarin e Gjirokastrës, prej të cilave s’mbeti asnjë gjurmë dhe dihet në c’gjendje ishte Gjirokastra, përderisa prej dy vjetësh po restaurohet gjithe Qafa e Pazarit me financim të Fondacionit Amerikano Shqiptar për Zhvillim.
Po i njëjti personazh që sot shqetësohet për restaurimet e kishave, që ka qenë fitues i tenderave ne restaurime, e masakroi kishën e Mesopotamit me ndërhyrjet që bëri në strukturat e kishës në vitet 2010, duke rrezikuar fort qëndresën e saj, mjafton të shohësh debatet mediatike të kohës për këtë objekt, i cili është mbajtur në këto vite me trarë e me shtylla hekuri, dhe që më në fund po i nënshtrohet restaurimit përfundimtar.
Është sërish po R. Gega, autori i projektit të famshëm për motel e fusha tenisi brenda në Kalanë e Lezhës në vitet 2010-2012 që u anullua dhe u hodh poshtë nga Ministria e Kulturës që në vitin 2014.
Jo vetëm kaq por në vitin 2012 me urdhër të Ministrit të atëhershëm të Kulturës Aldo Bumci, Reshat Gegës iu hoq e drejta e ushtrimit të licences për deklarim të rremë.
Inati dhe mllefi i Gegës qëndron te fakti se sot, Ministria e Kulturës po i realizon projektet e kishave në fjalë, qoftë të Mesopotamit, qoftë të Labovës dhe të të shumë kantiereve të restaurimit të hapura në Gjirokastër, Berat e jo vetëm me konsulencën profesionale të Aleksander Meksit e Pirro Thomos, nga njohësit më të mirë të kishave bizantine dhe të objekteve të kultit.
Prej katër vitesh Gega përballet në prokurori e në gjykata me Zyrtarë të Ministrisë së Kulturës për këto shpifje.
Edhe pse gjyqet e njëpasnjëshme janë fituar vazhdimisht nga Ministria e Kulturës, Gega vijon të vjellë vrerin e tij në media, çdo herë që shikon se një kantier i ri është hapur në fushën e trashëgimisë kulturore.
