Kjo është foto e Antonio Lekës pak para arrestimit nga policia e Lezhës mbrëmjen e së hënës (9 janar). Ai shihet me një qeleshe në kokë dhe i pajisur me antiplumb brenda një servisi makinash në Ishull-Lezhë. Gjithashtu mban në dorë një automatik.
36-vjeçari u prangos nga policia në kuadër të operacionit të koduar “Lavazhi”, teksa udhëtonte me automjetin e tij nga zona e Milotit në drejtim të Lezhës.
Gjatë kontrollit, forcat e rendit gjetën arsenalin e armëve, si një pistoletë, 1 automatik blindshpues, 550 fishekë luftarakë, 1 palë dylbi, 1 antiplumb ushtarak, 1 thikë, 1 çantë ushtarake, 75 gramë lëndë e dyshuar narkotike kanabis dhe rroba kamuflazhi. Në momentin e arrestimit mësohet se nuk ka bërë rezistencë.
Pas shoqërimit në polici, 36-vjeçari ka deklaruar se ishte nisur për të vrarë politikanët e Lezhës, por pa folur me emra.
Gjithashtu në media kanë qarkulluar informacione se 36-vjeçari vuante nga probleme të shëndetit mendor, të cilat nuk janë bërë të ditura ende në rrugë zyrtare.
Për shkak të sekretit hetimor, duke qenë se ngjarja është në hetim, nuk jepen detaje të tjera në lidhje me motivet dhe objektivin e synuar nga i arrestuari. Ky shtetas rezulton i arrestuar edhe në vitin 2015 për lëndë narkotike.
