Një 27-vjeçare me origjinë shqiptare, e cila u qëllua disa herë me thikë në zonën e Pylaia në Selanik, ka rezultuar se është kërcënuar vazhdimisht me mesazhe nga ana e autores së krimit, një 25-vjeçare po shqiptare.
Sipas avokatit të Joanës, Andreas Theodoropoulos, autorja 25-vjeçare në dëshminë e saj ka thënë se i ka dërguar mesazhe të ndryshme përmes rrjeteve sociale 27- vjeçares dhe prindërve të saj, me të cilat e kërcënonte me vrasje.
“Merre vajzën tënde se do ta vras”, u shkruante 25-vjeçarja prindërve të viktimës, ndërsa thoshte se ishte e fiksuar dhe xheloze se ajo ishte më e bukur. Gjithashtu, në mesazhe i thoshte se nëse do ta merrte vesh se do të kishte kontakte me ish-burrin e saj, do ta shkatërronte atë dhe familjen.
E reja me origjinë shqiptare u sulmua pasditen e së mërkurës, “nga një grua xheloze, e cila donte t’i merrte jetën me një organizim të koordinuar, duke planifikuar krimin”.
Autorja e krimit mendonte se ish-burri do ta linte përfundimisht për 27-vjeçaren.
Avokati i së plagosurës ka shpjeguar se viktima është goditur dy herë me thikë në pjesë kyçe të barkut, plagët ishin të thella dhe jeta e saj ishte në rrezik të menjëhershëm, pasi nëse goditjet do të kishin qenë disa centimetra më afër vendit ku ndodhet arteria qendrore, ato mund ta kishin privuar nga jeta.
“Autorja nuk kishte asnjë shkak dhe asnjë arsye për të kryer veprën penale të vrasjes me dashje ndaj saj, në gjendje të qetë shpirtërore”, theksoi ai.
Avokati theksoi se goditja e tretë me thikë në shpatull ishte ajo që i shpëtoi jetën, pasi thika e mprehtë ishte ngulur në atë mënyrë që autorja të mos e hiqte dot për të vazhduar më tej goditjet me thikë, ndërkohë që nuk kishte asnjë mjet tjetër për të kryer vrasjen.
Siç ka rrëfyer për “Protothema”, 27-vjeçarja Joana, ajo nuk ka pasur në asnjë rrethanë lidhje me ish-bashkëshortin e autores, por kishin vetëm marrëdhënie miqësore.
“Më tha të shkoja drejt saj dhe më goditi tri herë me thikë”, shprehet ajo.
“Papritur, kjo grua u shfaq në rrugën time dhe më tha të shkoja në shtëpinë e saj për të folur. Fillova të vrapoj, sepse ndjeva se diçka do të më bënte. Sapo shkova në shtëpinë e motrës sime, ajo më kapi dhe më goditi me dy thika në bark dhe një në shpatull”, shprehet më tej.
