Autoritetet tajlandeze vazhdojnë pa u ndaluar operacionet për shpëtimin e 12 djemve dhe trajnerit të tyre të mbetur të bllokuar në një shpellë nga ujërat e përmbytjes, ndërsa retë që po grumbullohen mbi zonë japin sinjalin se do t’i duhet të marrin një vendim shumë shpejt.
Meteorologët parashikojnë reshje të dendura në ditët në vazhdim dhe nuk ka asnjë garanci që dhoma e nëndheshme ku djemtë gjenden nuk do të përmbytet.
Qëndrimi i tyre aty disa muaj për të pritur kalimin e stinës së shirave duket një plan i parealizueshëm dhe pesha e vendimit për ti nxjerrë përmes zhytjes, po shtohet gjithnjë e më shumë mbi supet e autoriteteve.
Vdekja e një prej zhytësve profesionistë në thellësi të shpellës të premten e ka bërë këtë vendim edhe më të vështirë, ndërsa opsionet për shpëtimin e futbollistëve të vegjël duket se janë shumë të pakta dhe që të gjitha plot rrezik.
Përmes një letre mjaft prekëse nga thellësia e tokës, djemtë i thanë prindërve të tyre se janë mirë dhe se së shpejti do të dalin që aty, ndërsa familjet presin jashtë shpellës për lajmin e mirë. Murgjit budistë që luten çdo natë para shpellës, mendojnë se moti i thatë që ka zgjatur çuditshëm është rezultat i përpjekjeve të tyre.
Por parashikimet për reshje të shpejta zor se do të përgënjeshtrohen nga lutjet dhe vendimi për nxjerrjen e djemve nga shpella bëhet gjithnjë e më urgjent me çdo orë që kalon
