Këshilli Bashkiak i Durrësit ka vendosur t’i vijë në ndihmë familjes Konçi në Romanat, pas humbjes tragjike të tre fëmijëve trenjakë gjatë djegies së shtëpisë së tyre.
Sot në mbledhjen e radhës, Këshilli ka miratuar ndihmën në vlerën 1 500 000 lekë të reja për prindërit e Artur, Valerio dhe Alesio Konçi, si pasojë e djegies së banesës, dhe dërgimin e dokumentacionit në Drejtorinë e Përgjithshme të Emergjencave Civile pranë Ministrisë së Brendshme për vazhdimin e procedurave të mëtejshme.
Ngjarja e rëndë ndodhi më 20 shtator në fshatin Romanat të Durrësit, kur tre fëmijët e mitur, trinjakë të moshës 3 vjeç, humbën jetën pasi banesa e familjes Konçi është përfshirë nga flakët. Fëmijët kanë qenë vetëm në banesë pasi nëna e tyre kishte shkuar të merrte dy vajzat në shkollë, ndërsa babai ishte në punë. Fqinjët e familjes nuk kanë mundur t’u vijnë në ndihmë pasi dritaret e shtëpisë kanë qenë me hekura.