Partia Demokratike dhe Lëvizja Socialiste për Integrim para afro 10 ditësh morën vendimin që 57 deputetët e tyre të lënë mandatet e deputetëve, që në bazë të Kodit Zgjedhor, plotësohen me emrat që pasojnë në listat respektive të partive.
Basha dhe Kryemadhi për t’i paraprirë dhe mos lejuar pranimin e mandateve nga pasardhësit e listave të tyre, krijuan brenda selive të partive të tyre një listë të tyren pa asnjë vlerë ligjore, ku pothuajse të gjithë firmosën se nuk do ta pranojnë mandatin e deputetit kur t’iu vinte radha.
Por, këto firma dhe kjo listë nuk ka asnjë vlerë ligjore dhe kushtetuese ndaj nuk pengon asnjërin/en nga ata që pasojnë në listë që të pranojnë mandatin e deputetit.
Por, pse është e pavlefshme dhe tërësisht nul firma e lëshuar në listat e partive nga kandidatët që pasojnë e që iu takon mandati?
Së pari, të gjithë ata që ishin deputetë, firmosën me emër të përveçëm se heqin dorë nga mandati që kishin dhe nuk firmosën një listë emërore në bllok. Sepse, vetëm duke firmosur tek e tek e dërguar pranë Kuvendit ose KQZ-së, shkresa merr vlerë ligjore
Së dyti, të gjithë ata që pasojnë në listë dhe iu takon mandatii i deputetit, nuk mund të firmosin që lënë mandatin kur akoma nuk e kanë marrë atë. Për ta bërë këtë, ata duhet të shkojnë pranë KQZ-së dhe jo nga zyrat e partive, pasi kjo nuk do të kishte dhe nuk ka asnjë vlerë juridike dhe ligjore.
Pra, sot që flasim, të gjithë ata që kanë firmosur një fletë që jua ka dhënë PD apo LSI për lënien e mandatit, duhet ta kenë parasysh se ajo firmë është nul, pa asnjë vlerë ligjore, pasi e vetmja mënyrë për të refuzuar apo pranuar mandatin, është të shkosh vetë në KQZ dhe të deklarosh me shkrim këtë gjë. Pra, edhe pse ata kanë firmosur në listën e partisë për lënie mandati, ajo nuk ka asnjë vlerë, pasi vetëm në KQZ merret vendimi ligjor nëse e pranon apo jo mandatin. Çdo rrugë tjetër është e pavlefshme dhe nul nga ana ligjore.
Thënë këtë, të gjithë ata që sot janë në listat e PD-LSI, kanë mundësinë të shkojnë e të marrin mandatin e deputetit ose ta refuzojnë atë në KQZ. Çdo firmë në shkresa të tjera është e pavlerë.
Ndoshta ky ka qenë një truk i PD-LSI për të detyruar moralisht (ose trajtuar si të paditur) pasardhësit në lista që të mos merrnin mandatet, ama, nga ana ligjore dhe kushtetuese, secili/a prej tyre mund të shkojë që nesër në KQZ dhe të bëhet zyrtarisht deputet i Kuvendit të Shqipërisë!/Javanews.al
