Ditën e djeshme në redaksinë e “Panorama’, erdhi një denoncim se një i burgosur në burgun e Burrelit ishte keq trajtuar nga drejtori i këtij burgu dhe ai kishte tentuar të vriste disa herë veten. Ne kontaktuam me nënën e këtij të burgosurin zonjën Majlinda Media, e cila na i konfirmoi këtë fakt.
Sot një ditë pas këtij denoncimi ka reaguar dhe drejtoi i Burgut të Burrelit, Fatjon Kurti, i cili deklaron se asgjë nuk është e vërtetë.
“Pikë së pari, dua t’i siguroj të gjithë familjarët e të dënuarve dhe paraburgosurve por edhe opinionin publik se “busull” e punës time si drejtues i këtij institucioni, dhe e stafit tim, në mënyrë të padiskutueshme është dhe do të jetë Ligji 8328 datë 16.04.1998 “Për të drejtat dhe trajtimin e të dënuarve dhe paraburgosurve”, i ndryshuar, konkretisht Neni 5, paragrafi I-rë dhe II-të i tij, dhe në asnjë rast apo rrethanë nuk do të lejohet shkelja e një pike të këtij ligji”, shkruan Kurti në reagimin e tij.
Reagim i plotë
Duke marrë shkas një shkrim të bërë ditën e djeshme datë 05.02.2018 në median elektronike, nga familjarët e shtetasi Krenar Medja i cili po kryen dënimin në ambientet e IEVP Burrel, dhe konkretisht nga nëna e tij, moralisht dhe ligjërisht i përgjigjem këtij shqetësimi si më poshtë:
-Pikë së pari, dua t’i siguroj të gjithë familjarët e të dënuarve dhe paraburgosurve por edhe opinionin publik se “busull” e punës time si drejtues i këtij institucioni, dhe e stafit tim, në mënyrë të padiskutueshme është dhe do të jetë Ligji 8328 datë 16.04.1998 “Për të drejtat dhe trajtimin e të dënuarve dhe paraburgosurve”, i ndryshuar, konkretisht Neni 5, paragrafi I-rë dhe II-të i tij, dhe në asnjë rast apo rrethanë nuk do të lejohet shkelja e një pike të këtij ligji.
-Së dyti, përsa i përket pretendimeve të familjarëve të të dënuarit Krenar Medja se nuk është trajtuar dhe nuk i është ofruar shërbimi i nevojshëm shëndetësor, më vjen shumë keq për këtë shqetësim pasi nuk është absolutisht i vërtetë. Unë jam vetë prind dhe e mirëkuptoj shqetësimin e saj si nënës, por njëkohësisht i bëj me dije dhe e siguroj se në asnjë rast të vetëm, djalit tuaj nuk i ka munguar shërbimi shëndetësor, dhe nuk i është cënuar asnjë lloj e drejte e garantuar me ligj.
-Së fundmi, dua t’i them nënës së të dënuarit në fjalë, se është përgjegjësi dhe detyrimi imi ligjor personal e institucional, që të garantoj respektimin e të drejtave njerëzore dhe trajtimi me dinjitet e pa diferencime, konform ligjit dhe Rregulloreve në fuqi, për çdo të dënuar/paraburgosur që kryen dënimin në Institucionin e Ekzekutimit të Vendimeve Penale Burrel.