Kukësi ka prezantuar pak minuta më parë trajnerin e ri, austriakun Peter Pakult. Gjithashtu krahas 58-vjeçarit u prezantua si drejtori i ri sportiv Nderim Nexhipi. Si ndihmës i austriakut do të jetë kapiteni aktual i ekipit Rrahman Hallaçi, i cili për herë të parë do të veshi tutat e trajnerit, duke i dhënë praktikisht fund futbollit të luajtur.
Në prezantimin e Pakult ishte i pranishëm edhe presidenti Safet Gjici, i cili nuk ngurroi të falënderoj austriakun për pranimin e ofertës. “Duhej një trajner i tillë për të mbrojtur titullin dhe Kupën. Është hera e parë që në Shqipëri vjen një trajner me CV të tillë,” – deklaroi Gjici. Mësohet se trajneri ka firmosur për një vit e gjysmë. Pakult do të përfitojë 8 mijë euro në muaj. Kroati ka firmosur për 1 vit e gjysëm me klubin verilindor dhe do te zëvendësojë kështu serbin Milinkoviç.
Faza përgatitore Kukësi do ta zhvillojë në Antalia nga data 4 janar deri në 16 janar. Me ekipin do të bashkohet edhe mesfushori i Skënderbeut, Donjet Shkodra.
“Jemi në vendin e 4-t dhe na duhen 2 lojtarë për të përforcuar skuadrën, shpresoj të jemi të suksesshëm. Do punoj për të mbrojtur titullin, do njihemi me ekipin në fazën përgatitore. Kam punuar me Salihin dhe kam ardhur shpesh në Shqipëri për të ndjekur lojtarë. Kërkoj futboll ofensiv dhe shpresoj që lojtarët të përshtaten sa më shpejt me idetë e mia të lojës”, u shpreh trajneri i ri i kampionëve.
