Një makinë është djegur gjatë orëve të para të mëngjesit nëë Shkodër. Policia ka njoftuar se ngjarja ka ndodhur në lagjen “Tre Heronjtë”. Mjeti është në pronësi të efektivit të policisë, Sokol Kroni, në Shkodër dhe ka qenë i parkuar para banesës së tij.
“Më datë 14.05.2022, rreth orës 04:00, në lagjen “Tre Heronjtë”, Shkodër, është djegur pjesërisht mjeti tip “Mitsubishi” në pronësi të shtetasit S. K., 54 vjeç, me detyrë punonjës policie në Komisariatin e Policisë Shkodër. Automjeti ka qenë i parkuar përpara banesës së këtij shtetasi”, thuhet në njoftimin e policisë.
Ndërkohë këto janë pamjet kur një person i cili mban në kokë një kapuç afrohet pranë automjetit tip “Mitsubishi” dhe i vendos zjarrin. Pasi makina përfshihet nga flakët ai largohet menjëherë duke vrapuar.
Deri më tani, autori i kësaj ngjarje ka mbetur i paidentifikuar. Policia po vijon punën për kapjen e tij dhe zbulimin e shkaqeve dhe rrethanave të plota të ngjarjes.
