Ministri i Jashtëm i Serbisë, Ivica Daçiç, tha se zgjidhja e kompromisit për çështjen e Kosovës nuk mund të nënkuptojë që Serbia të pranojë pavarësinë e Kosovës në tërë territorin e saj.
“Për ne tani është e rëndësishme që të gjejmë një zgjidhje kompromisi. Kjo zgjidhje nuk mund të bëhet me detyrim, që Serbia ta njohë Kosovën si shtet të pavarur në tërë territorin e saj. Ky nuk mund të jetë kompromis”, tha Daçiç në një konferencë për media të hënën në Beograd, transmetojnë mediat serbe.
Ai tha se Serbia nuk paraqet asnjë pengesë për vazhdimin e dialogut për normalizimin e marrëdhënieve me Kosovën, porse kërkon të hiqet taksa 100% që Kosova u ka vënë prodhimeve të importuara nga Serbia.
Dialogu midis palëve është ndërprerë prej se Kosova e ka marrë vendimin për këtë taksë në nëntor të vitit të kaluar. Qeveria e Kosovës, e udhëhequr nga kryeministri Ramush Haradinaj, ka thënë se taksa nuk do të hiqet derisa Serbia nuk e njeh Kosovën.
Presidenti i Serbisë, Aleksandar Vuçiç, ka thënë se dialogu me Kosovën nuk mund të vazhdojë pa u hequr kjo taksë. Idenë për ndryshimin e kufijve, si mundësi për normalizimin e marrëdhënieve, e kanë përmendur më herët edhe udhëheqësit e Kosovës, edhe ata të Serbisë.
Javën e kaluar, u anulua një takim midis përfaqësuesve të të dyja vendeve, i planifikuar të mbahet më 1 korrik në Paris. Takimi i paralajmëruar ka qenë nismë e presidentit të Francës, Emmanuel Macron, dhe kancelares gjermane, Angela Merkel.
Është e paqartë nëse ky takim do të mbahet në ndonjë datë të mëvonshme, ndërkohë që normalizimi i marrëdhënieve mbetet kusht si për Kosovën, ashtu edhe për Serbinë, që të përparojnë në rrugën e integrimit evropian.
