Sa më shumë para të kesh, dhurata aq më të shtrenjta do bësh. Fiks si VIP-at. Ndonjëherë ata i bëjnë edhe të çuditshme, që ende mbahen mend. Je në fundjavë dhe meqë ke ende kohë për të bërë dhuratat e festave, merre ndonjë ide. Këta të jashtmit e kanë parë botën me sy më parë se ne dhe çoç dinë më shumë.
Ja për shembull, ku ka dhuratë më të mirë se sa një rrotë djathi e madhe? John Legend ia bleu një gruas për të festuar 2015-ën. Të kishte për gjithë vitin për t`ia hedhur makaronave.
Kthehemi pas, kur Justin Bieber ishte 17 vjeç. Ai prenotoi një lokal për vete dhe Selenën. Me kosto zero, sepse është VIP. Ama nëse do ta kishe prenotuar ti, do të të kushtonte 475 mijë dollarë. E me kaq para ti mund të kishe blerë nja 5 shtëpi të mira në Shqipëri. Po histori tjetër kjo. Kaq nuk shpenzon dot, e mbase as një lokal nuk e zë dot të gjithin për vete, por të paktën prenoto dy bileta dhe mere mikun më të mirë pas orës 12-të për të festuar në një nga lokalet e zonës ku jeton.
Ke një shoqe të fiksuar pas biçikletave? Ylli i “Friends” Courteney Cox i bleu Jennifer Aniston-it një biçikletë me një stol jo të zakonshëm. Ai ishte Chanel dhe kushtonte plot 12 mijë dollarë.
“Ajo është princesha ime dhe meriton më të mirën edhe kur është në tualet”, tha Ben Affleck njëherë e një kohë kur ishte bashkë me Jennifer Lopez. Për këtë arsye i bleu një kapak WC-je të mbushur me xhevahirë që kushtoi plot 105 mijë dollarë.
Angelina Jolie, për të festuar përvjetorin e martesës i dhuroi Brad Pitt-it makinën origjinale të shkrimit të përdorur nga Hemingway. Po ç`e donte Brad atë? Mbase bën koleksione. 250 mijë dollarë shpenzoi ajo.
