Kamerat e sigurisë së një subjekti afër Prokurorisë së Durrësit kanë fiksuar momentin e dhunimit të avokatit Ilia Ilia dhe kanë identifikuar si autorin kryesor shtetasin Mondi Voga.
Ky i fundit është shpallur në kërkim që ditën e ngjarjes, pasi vetë i dëmtuari ka arritur ta identifikojë atë që në momentin e parë dhe ta referojë emrin e tij në organin e hetimit si person që ka lidhje me prokurorin Arjan Ndoj. Lidhja e prokurorit me agresorin e avokatit është konfirmuar tashmë edhe me foto mes tyre.
Për këtë shkak, Arjan Ndoj është person në hetim si i dyshuar se ka organizuar sulmin ndaj avokatit, me të cilin ishin konfliktuar keqas verbalisht një ditë para ngjarjes në një seancë gjyqësore.
Pasi avokati i është drejtuar duke e cilësuar atë “fshatar”, prokurori ia ka kthyer po në sallën e gjyqit se “do të bëhesh pishman”.
Të paktën ky është versioni i treguar nga i dëmtuari Ilia për “Panorama” ditën e ngjarjes, çka ai akuzoi publikisht prokurorin si organizator të sulmit. Madje ai ashtu i përgjakur pas ngjarjes, është ngjitur në zyrën e prokurorit nga ku i është drejtuar se “do të ma paguash shtrenjtë këtë që më bëre”.
Gjatë marrjes në pyetje, Arjan Ndoja ka mohuar të ketë lidhje me këtë ngjarje. Tashmë, mbetet enigmatike se si ka korresponduar në mënyrë kaq zinxhir brenda dy ditësh e gjithë situata, ku një ditë më parë avokati konfliktohet me prokurorin dhe të nesërmen, miku i këtij të fundit e dhunon avokatin përpara derës së Prokurorisë.
Vetë avokati deklaroi ditën e ngjarjes se agresori i kishte përmendur incidentin me prokurorin Ndoj para se ta godiste.
“Më datë 19.07.2018 u referuan materialet në Prokurorinë pranë Gjykatës së Shkallës së Parë Durrës dhe po punohet për kapjen e shtetasit M.V., 42 vjeç, banues në fshatin Halil, Krujë. Në bashkëpunim me një shtetas tjetër, pranë Gjykatës Durrës, ka goditur me grusht avokatin I.I., vjeç 60, banues në Durrës. Gjithashtu, është identifikuar edhe bashkëpunëtori i tij dhe po punohet për arrestimin e tij”,- deklaroi Policia.
Ndërkaq, mësohet se Policia e Durrësit ka shkuar në banesën e Mondi Vogës në Krujë, por ai mesa duket kishte marrë arratinë. Voga u shfaq pa maska bashkë me bashkëpunëtorin e tij. Në pamjet e kamerës së sigurisë duket që personi tjetër largon një inspektor policie, me të cilin Ilia po shoqërohej në ato momente. Më pas, Voga e qëllon me grushte, derisa inspektori dhe një tjetër qytetar ndërhynë.
