Një histori e rëndë dhune fizike dhe tmerri prej vitesh fshihej brenda mureve të shtëpisë së një familjeje me 5 anëtare.
Jetnor Zhaboli 35-vjeç, mbante të kyçur në banesë, gruan dhe fëmijët e mitur, si edhe nënën e tij, duke mos i lejuar që të dalin nga shtëpia sa herë që ai largohej. Pa i lejuar kurrfarë komunikimi as me persona të tjerë.
Burri me profesion ekonomist kishte instaluar kamera sigurie në çdo cep të shtëpisë, në derën kryesore, në dritaren e dhomës së gjumit, përfshirë edhe tualetin. Jo vetëm kaq për vite ushtronte dhunë fizike dhe psikologjike, në mënyrë të vazhdueshme, si dhe u ndalonte komunikimin me persona të tjerë. Dhuna ishte bërë aq e rëndë sa gruaja kishte tentuar të kryente dhe vetëvrasjen.
Si u zbulua ngjarja?
Një person të cilit policia i ruan identitetin, telefonoi në sallën operative pas një kohe të gjatë pa komunikim me gratë, dhe kërkoi ndihmën e policisë të shkojnë në banesë.
Efektivët e komisariatit numër 1 trokitën në derën e banesës, por derën e gjetën të kyçur. Të vëna nën terror gratë nuk u përgjigjën. Policia doli në kërkim të kryefamiljarit të cilin e detyruan të fusë brenda në banesë uniformat blu.
Duke pasur përballë personin që veç dhunës psikologjike e ka dhunuar edhe fizikisht, bashkëshortja e tij nuk ka thënë asnjë fjalë para hetuesve. Por nëna e 35-vjeçarit ka gjetur guxim. Tregoi se djali i mbante kyçur dhe ushtronte dhunë mbi të tre duke çuar dhe në prangosjen e tij.
Kaq është dashur që efektivët të arrestojnë 35 vjeçarin dhe të marrin në mbrojtje familjen. Punonjësit e shërbimit social janë vënë në dispozicion të grave dhe 2 fëmijëve të mitur që kanë përjetuar dhunën. Ndërkohë në banesë u gjetën edhe 2 letra lamtumire të shkruara nga gruaja e 35-vjeçarit, e cila në gjendje të rënduar psikologjike prej vitesh, kishte menduar edhe vetëvrasjen.
Sapo largohej nga banesa 35-vjeçari bllokonte valët e telefonit në mënyrë që gruaja dhe nëna e tij të mos komunikonin me persona të tjerë, dhe aq më pak të njoftonin policinë.
Ky nuk ka qënë rasti i vetëm që burri mban të izoliar gruan dhe fëmijët, Alpenews.al ju risjell dhe një tjetër rast që shkoi mjaft opinionin publik.
Ngujoi dhe rrahu për 6 vite gruan dhe fëmijët, arrestohet ekstremisti fetar
Prej 6 vitesh me radhë, një grua dhe dy fëmijët e saj të mitur janë dhunuar sistematikisht nga bashkëshorti i saj Gjergj Laçi. 50-vjeçari, ekstremist fetar, jo vetëm që u kishte lënë plagë të mëdha nga traumat e dhunës, por edhe i kishte ngujuar, duke u kufizuar çdo kontakt me botën e jashtme.
Ajo çfarë e bën edhe më të trishtë këtë histori është fakti se familja ishte ngujuar në zemër të kryeqytetit, në zonën e 5 Majit në Tiranë, ku edhe fqinjët ishin në dijeni të ngujimit, por askush prej tyre nuk ka reaguar. Madje edhe të afërmit nuk kanë marrë mundimin të trokasin në dyert e policisë, por vetëm njëri prej tyre arriti të marrë guximin dhe të bëjë denoncimin, çka solli edhe arrestimin e 50-vjeçarit Laçi.
Alpenews.al
