Gazeta SHQIP mëson se edhe tre të burgosur kishin dijeni mbi planin e arratisjes së Arbër Çekajt dhe Fatmir Pjetrit.
Burime për SHQIP bëjnë me dije se Dritan Sinani, Elvis Fejzullahu dhe Bekim Bulica janë vënë në hetim nga organet kompetente, pasi ishin njohur me planin e bosit të kokainës dhe ‘Babagjyshit’, për t’u arratisur nga 313-ta.
Bashkëpunëtor ishte edhe Lulzim Çepele, i cili preu damarët e dorës për të tërhequr vëmendjen e gardianëve dhe për t’i hapur rrugë arratisjes së Çekajt dhe Pjetrit.
Prokuroria ka drejtuar gishtin edhe tek disa efektivë që mendohet se kanë ndihmuar dyshen për t’u arratisur.
Gëzim Rramushi, Sajmir Shahini, Bashkim Muça, Oldi Myzyri, Redion Maloku dhe Edmond Prenga akuzohen se nuk kanë kontrolluar të burgosurit para daljes në ajrosje.
Gazeta SHQIP ka siguruar edhe dosjen e plotë, ku faktohet se këta efektivë kanë lejuar që Fatmir Pjetri të dilte në ajrosje me një çantë të kuqe ku ndodhej litari dhe levat e hekurit, që do të përdoreshin për arratisjen.
6 punonjësit e policisë së burgjeve po hetohen nga prokuroria lidhur me rolin e tyre në tentativën e dështuar të arratisjes.
Si ndodhi tentativa e arratisjes
Arbër Çekaj dhe Fatmir Pjetri që tentuan të largohen nga burgu 313 kishin krijuar me çarçafë një litar 20 metra të gjatë. Ata arritën të zbresin nga tarraca deri në zyrat e administratës, ndërsa qëlluan një efektiv me çengelin që përdoren për të zbritur nga zona e ajrimit. Çekaj është dënuar me 14 vite burg për trafik ndërkombëtar droge, ndërsa Pjetri si pjesë e bandës së babagjyshëve.
