Policia e Fierit ka ekzekutuar urdhrin e arrestimit të një 38-vjeçari të akuzuar për vrasje.
38-vjeçari së bashku me vëllanë e tij (aktualisht në paraburgim) pas një konflikti për motive të dobëta kanë qëlluar mearmë në drejtim të një automjeti që drejtohej nga 41-vjeçari E.J., i cili si pasojë e plagëve të marra ka humbur jetën.
Ngjarja ka ndodhur më 7 dhjetor të 2023-shit në lagjen “16 Prilli” në Fier.
“Ekzekutohet nga Sektori për Hetimin e Krimeve të Rënda urdhri i ndalimit për një 38-vjeçar, i akuzuar për vrasje.
Specialistët e Sektorit për Hetimin e Krimeve të Rënda në DVP Fier ekzekutuan urdhrin e Prokurorisë Fier për ndalimin e shtetasit A. G., 38 vjeç, banues në Fier.
Gjykata e Fierit ka caktuar ndaj këtij shtetasi masën e sigurisë “Arrest me burg”, për veprat penale “Vrasje me paramendim” dhe “Mbajtja pa leje dhe prodhimi i armëve, armëve shpërthyese dhe i municionit”.
38-vjeçari dyshohet se, në bashkëpunim me vëllain e tij, shtetasin K. G. (aktualisht në paraburgim në ambientet e IEVP Fier), më datë 07.12.2023, në lagjen “16 Prilli”, Fier, pas një konflikti për motive të dobëta, kanë qëlluar me armë zjarri në drejtim të një automjeti që drejtohej nga shtetasi E. J., 41 vjeç.
Si pasojë e të shtënave, 41-vjeçari ka humbur jetën në vendngjarje”, thuhet në njoftim.
