Tre persona të maskuar grabitën kasafortën e një supermarketi në zonën e “Komunës së Parisit”, në Tiranë.
Ngjarja ndodhi dje, në orët e para të mëngjesit, te kryqëzimi i rrugës “Medar Shylla” me rrugën “Prokop Mima”. Burime nga Policia thanë se 3 personat e dyshuar, që ende nuk janë identifikuar, kanë thyer xhamat e supermarketit, duke përdorur mjete të forta.
Më pas janë futur brenda duke marrë kasafortën me para, si dhe disa mallra të ndryshme. Nga verifikimi i kamerave të sigurisë, autorët e maskuar shfaqen duke zhvendosur kasafortën dhe mallrat nga supermarketi në drejtim të një makine që kishin parkuar aty afër. Më pas janë larguar me shpejtësi.
Ngjarja ka ndodhur në vetëm pak minuta. Ndërsa në vendngjarje kanë mbërritur shërbimet e Komisariatit nr.2, të sinjalizuar nga banorët e zonës që kanë dëgjuar sinjalin e alarmit, që është aktivizuar pas thyerjes së xhamave.
Menjëherë është formuar grupi hetimor dhe kanë nisur verifikimet për zbardhjen e rrethanave të ngjarjes, identifikimin dhe arrestimin e autorëve. Ndërsa gjatë paradites së djeshme janë marrë në pyetje pronari dhe menaxheri i supermarketit për të dhënë shpjegime rreth shumës së parave që ndodheshin në kasafortën e grabitur.
Megjithatë, deri tani Policia nuk ka të dhëna se sa ka qenë shuma e parave të grabitura. Përveç kamerave të sigurisë së supermarketit, janë sekuestruar edhe pamjet e kamerave të disa bizneseve pranë vendit të ngjarjes dhe përgjatë rrugëve nga ku mund të jenë larguar autorët pas grabitjes.
Por, deri tani ende nuk ka ndonjë person konkret të dyshuar për ngjarjen. Burimet thanë se janë shoqëruar disa persona si të dyshuar, por pas verifikimeve ata janë lënë të lirë.
PANORAMA
