Një ngjarje e rëndë është shënuar në Milano mbrëmjen e djeshme. Një festë mes shqiptarëve është kthyer në tragjedi.
Një 34-vjeçar qëlloi ndaj bashkatdhetarëve të tij dhe si pasojë e të shtënave një 23-vjeçar shqiptar humbi jetën ndërsa një 30-vjeçar u plagos, raporton abcnews.al.
Sipas Corriere della sera, dyshohet se “molla e sherrit” ka qenë një grua.
“Festa e ditëlindjes, disa gota dhe përpjekjet për t’iu afruar një gruaje”, shkruan Corriere.
Ngjarja e përgjakshme ndodhi rreth orës 23:30 pranë rrugës numër 8 të via Allea Comunale, në qendër të qytetit të vogël në provincën e Milanos, rreth 20 kilometra nga Legnano.
Tre shqiptarët e përfshirë në sherr kanë qenë pjesë e një grupi bashkatdhetarësh që festonin ditëlindjen.Duket se gjatë festës një nga të rinjtë e pranishëm ka shfaqur interes ndaj një gruaje në grup.
Për këtë arsye ka lindur një sherr i cili më pas ka rezultuar në të shtëna me armë, të cilat përfunduan në tragjedi.
Sipas rikonstruksionit të ushtarakëve të kompanisë Legnano, 34-vjeçari ka nxjerrë armën dhe ka qëlluar fillimisht 30-vjeçarin, duke e lënë të plagosur. Më pas pjesëmarrësit e tjerë të festës rrethuan sulmuesin, i cili qëlloi disa herë të tjera dhe një nga plumbat kapi 23-vjeçarin.
I riu ka ndërruar jetë pak orë më vonë në spitalin e Legnano-s, pasi plumbi i kishte dëmtuar arterien karotide, raporton abcnews.al.
Autori i dyshuar u arrestuar ndërsa karabinierët kanë sekuestruar pamjet filmike në zlonë për të bërë të mundur zbardhjen e plotë të rrethanave të ngjarjes.
