Policia e Shtetit ka arrestuar sot Anterio Kaloshi dhe Meardi Berberi, ky i fundit i shpallur në kërkim për ngjarjen e rëndë të Drilonit, ku u qëllua me breshëri të gjata automatiku hotel “Voloreka”.
Ajo çfarë shihet në sendet e sekuestruara nga policia ndaj tij është edhe një kartë që shkruan “Avokat” që lë të kuptohet se ka ushtruar këtë profesion.
Policia ka arrestuar 3 ditë më parë tre persona të tjerë të dyshuar si autorë të ngjarjes së ndodhur pranë një hoteli në Tushemisht, ku u qëllua me breshëri armësh.
Mes të arrestuarve në pyllin e fshatit Vërdovë, Pogradec, ishte edhe Ilir Berberi. Ai u arrestua nga policia në një çadër që kishte ngritur enkas për t’u strehuar.
Ndërkohë në gjykatën e Pogradecit po zhvillohet seanca ndaj Ilir Berberit një ndër të arrestuarit për sulmin dhe pritet të jepet masa.
Ky i fundit së bashku me Meardi Berberi të dy në rolin e organizatorëve, si edhe shtetasi Anterio Kaloshi në rolin e ekzekutorit, më datë 08.08.2020, dyshohet se kanë tentuar të vrasin me armë zjarri, djalin e pronarit të hotelit, shtetasin J. M., ku si pasojë e të shtënave me armë, janë dëmtuar godina e hotelit dhe 7 automjete të parkuara pranë tij.
