Policia italiane shkatërroi të mërkurën një organizatë kriminale të shfrytëzimit të prostitucionit që vepronte në veri të Italisë, kryesisht në Milano, Romë dhe Torino.
Në pranga ranë 25 shqiptarë të përfshirë në këtë aktivitet kriminal. Mediat italiane raportojnë se në krye të kësaj rrjeti prostitucioni ishte një shqiptar nga Fieri me iniciale K.M. Atij i thërrisnin me pseudonimin “xhaxhai”, ndërsa pjesëtarët e tjerë të bandës janë të afërmit e tij.
Rreth 30 vajza shfrytëzoheshin për prostitucion nga ky grup, të cilat janë kryesisht shqiptare, rumune dhe moldave të moshës nga 20 deri në 25 vjeç. Ato ishin dërguar në Itali me premtimin se do të punësoheshin dhe pasi kishin mbërritur aty, ishin nxjerrë në rrugë. Hetuesit italianë thonë se një vajzë paguhej 500 Euro për një natë, dhe fitimet në muaj shkonin rreth 12 mijë Euro.
Kjo organizatë kriminale qarkullonte më shumë se 40 mijë Euro në muaj, duke shfrytëzuar vajzat për prostitucion. Hetimi i policisë italiane nisi pas denoncimit të një prej vajzave të shfrytëzuar, duke çuar kështu në arrestimin e 25 shqiptarëve, identiteti i të cilëve nuk është bërë me dije. /tvklan.al
