Dalin detaje të reja mbi ngjarjen e rëndë që ndodhi mëngjesin e të shtunës në zonën e njohur si Qafa e Topit në Babicë të Vlorës, ku në automjetin tip Fiat Punto ngjyrë jeshile me targat TR 3784 R u ekzekutua 25-vjeçari Xhuljan Bullari me origjinë nga Peqini por që prej vitesh jetonte në Babrru të Tiranës.
10 persona janë marrë në pyetje në lidhje me ngjarjen. Pjesa më e madhe e tyre kanë qenë familjarë, të cilët kanë deklaruar se i riu kohët e fundit nuk ka patur konflikte, të paktën në dijeninë e tyre.
Ata kanë konfirmuar problemet e mëparshme të këtij të fundit me ligjin kur ka qenë i dënuar por sipas dëshmisë së tyre kjo ngjarje nuk mendohet të ketë lidhje me dënimin e mëparshëm të tij në 2018 për dhënie ndihme për kalim të paligjshëm të kufirit, dënim që i riu e ka vuajtur për 3 vite e 4 muaj.
Së fundmi, për shkak të sjelljes së mirë një pjesë e dënimit ishte kthyer në arrest shtëpie ku i riu e kishte shkelur edhe këtë të fundit. Familjarët pohojnë se që pas kohës që kishte dalë nga burgu deri tani nuk ka patur probleme.
Teksa dëshmojnë se i riu ishte nisur drejt Vlorës, ku do qëndronte deri të shtunën dhe do të kalonte kufirin drejt Italisë për të shkuar në Gjermani, ku 25-vjeçari ka jetuar edhe më parë. Në Gjermani do e priste i vëllai.
Familjarët nuk kanë patur dijeni për faktin se çfarë ka kërkuar në Babicë, teksa mendojnë se nga Tirana 25-vjeçari ka shkuar i shoqëruar. Ata dyshojnë se ka qenë i shoqëruar me ndonjë shok të tij.
Dëshmimtar ka qenë edhe personi që lajmëroi policinë e zonës, një banor i Babicës i cili kishte shkuar të kujdesej për tokën kur ka parë viktimën. Në dëshminë e tij nuk ka treguar detaje që të ndihmojnë uniformat blu të Vlorës, por ka përshkruar skenën e gjetjes së trupit.
Gjithashtu në vendgjarje janë pyetur edhe banorët e zonës të cilët kanë pohuar se nuk kanë dëgjuar krisma, çka nuk përjashton as faktin që 25-vjeçari të jetë ekzekutuar me pistoletë me silenciator, por mundësia më e madhe është që krismat të mos jenë dëgjuar për shkak të distancës.
Ekspertiza mjeko-ligjore ka nxjerrë në pah se viktima është goditur 3 herë; 1 herë në kokë që i ka shkaktuar vdekjen dhe 2 plumba në trup. Ndërsa një plumb i katërt ka kapur mjetin tip Fiat Punto në brendësi të tij. Viktima është goditur nga distancë e afërt me armë zjarri pistoletë, ndërsa nuk paraqet shenja dhune veç plagë prej armës së zjarrit.
Ekspertiza mjeko-ligjore ka arritur në përfundimin se viktima kishte disa orë i vdekur dhe mendohet se mund të jetë thirrur rreth orës 21:00 të mbrëmjes të së premtes në vendin ku u gjetë i pajetë për t’u ekzekutuar.
Janë sekuestruar kamerat e sigurisë të një karburanti aty pranë, kamera sigurie të cilat nuk kanë treguar asnjë detaj për shkak se në rrugë ka patur fluks automjetesh gjatë gjithë ditës.
Karburanti është në rrugën kryesore Vlorë-Babicë në pjesën e hyrjes së rrugës dytësore ku u gjet i vdekur Xhuljan Bullari. Makina e llojit Fiat Punto i përkiste një gruaje, nuk ishte automjet i vjedhur apo me targa të parregullta.
Identifikimi i viktimës është bërë pikërisht nga automjeti, pronarja e të cilit ka dhënë informacion mbi viktimën dhe më pas janë lajmëruar familjarët të cilët mbërritën në orën 13:00 të mesditës në morgun e Vlorës ku kanë identifikuar trupin dhe kanë dhënë dëshminë e tyre.
