Zbulohen detaje të reja në lidhje me dëshminë e dhënë sot nga ish-ministri i Brendshëm, Saimir Tahiri për dy orë e gjysmë pranë Prokurorisë së Krimeve të Rënda, në prani të dy prokurorëve Dritan Prençi dhe Vladimir Mara.
Burime të “BalkanWeb” brenda këtij institucioni kanë pohuar se ish-ministri ka dëshmuar në prani të dy avokatëve të tij, Artan Hajdari dhe Maks Haxhia, të cilët kanë hyrë e kanë dalë disa herë nga salla ku po merrej në pyetje.
Të njëjtat burime konfirmojnë për “BalkanWeb” se ish-ministri i Brendshëm gjatë gjithë dëshmisë ka qenë i qetë dhe korrekt.
Por, burimet nuk përjashtojnë edhe ndonjë tension të vogël apo stres që e ka kapur befasi, e ç’ka ka bërë që të kërkojë kohë për të pirë cigare. Ndërsa shoferi i tij i ka çuar paketën brenda ambienteve të Prokurorisë, mësohet se Tahiri ka kërkuar edhe një kafe.
Ish-ministri shkoi të dëshmonte sot rreth orës 14:00, një ditë pasi katër oficerë të policisë gjyqësore kontrolluan banesën e tij, situatë ku nuk e fshehu tensionin e doli në verandën e shtëpisë së tij për të tymosur një cigare.
