Një ngjarje e rëndë ka ndodhur në plazhin e Rrjollit në Velipojë, ku për herë të dytë brenda dy muajsh, një restorant është sulmuar.
Pas një sulmi me zjarr që ndodhi herën e parë, këtë herë restoranti u sulmua me tritol në orët e para të mëngjesit.
Rreth orës 3 të mëngjesit, dy persona të maskuar janë afruar pranë lokalit dhe kanë hedhur lëndën plasëse mbi soleten e restorantit. Pas shpërthimit, ata janë larguar me shpejtësi.
Fatmirësisht, pronari Kristian Preka ka shpëtuar për mrekulli pasi ishte duke fjetur pak metra më larg nga vendi i shpërthimit. Nga shpërthimi ka pasur vetëm dëme materiale, ndërsa askush nuk ka pësuar lëndime.
Preka, i cili ka jetuar në Gjermani për 10 vjet dhe ka investuar të gjitha kursimet e tij në këtë restorant, ka kërkuar nga policia dhe prokuroria që të zbardhin këtë ngjarje të përsëritur dhe të sigurojnë drejtësi. Ai ka shprehur shqetësimin e tij për sigurimin e biznesit dhe kërkon që autorët e sulmit të dalin para drejtësisë.
