4 dyshohet se kanë qenë personat që kanë hapur zjarr mëngjesin e sotëm përpara një lokali te rrethrrotullimi i Bradasheshit, duke i marrë jetën Bujar Çelës, vëlla i Talo Çelës. 50 vjeçari është vrarë në orën 05.45 të mëngjesit të sotëm, sapo ka zbritur nga makina e tij për të pirë një kafe.
Sipas informacioneve paraprake nga vendngjarja, dyshohet se 4 autorët kanë qenë të veshur si policë dhe kanë qëndruar gjithë kohën pranë lokalit ku u vra 50 vjeçari duke e pritur. Sapo ai ka parkuar makinën dhe ka dalë prej saj duke u drejtuar për në lokal, autorët kanë qëlluar të gjithë, njëkohësisht, drejt tij.
Nga kqyrja e trupit të viktimës dhe gëzhojave, dyshohet se atentatorët kanë përdorur armë zjarri pistoletë. Viktima është qëlluar nga vrasës profesionistë, të armatosur dhe të maskuar, të cilët nuk i kanë lënë mundësi as të reagonte.
Menjëherë në vendngjarje ka shkuar Policia e Elbasanit por dhe Forcat Speciale RENEA e FNSH nga Tirana që kanë nisur krehjen e zonës për kapjen e autorëve. Pak minuta pas kërkimeve, në fshatin Murrash, njësia administrative Papër, është gjetur një mjet tip Renault me targa AA 876 DC, tërësisht i djegur, i cili dyshohet se është i autorëve.
Bujar Çela punonte si taksist në zonë dhe priste udhëtarët që vinin nga Greqia.
Gjithashtu, Policia ka sekuestruar dhe pamjet e kamerave të zonës, për të hedhur dritë mbi ngjarjen dhe autorët. Në hyrje dhe dalje të qytetit të Elbasanit janë ngritur pika kontrolli.
