Bashkia e Beratit u vizitua nga një grup turistësh izraelitë të shoqëruar nga ish-ambasadori i Izraelit në Shqipëri, David Cohen, i cili vlerësohet si një nga aktorët më të rëndësishëm të promovimit të turizmit shqiptar në Izrael.
Vizitorët u pritën nga kryetari i bashkisë, Petrit Sinaj, si dhe një pjesë e stafit të tij. Në prezantimin e tij, Sinaj bëri një panoramë të shkurtër të zhvillimit ekonomik dhe kulturor të qytetit duke e vënë theksin te turizmi, si një nga shtyllat më premtuese në drejtim të zhvillimit ekonomik. Gjithashtu kryetari i Bashkisë vlerësoi lidhjet e hershme ndërmjet popujve tanë si dhe shembullin e veçantë që Shqipëria dhe Berati në veçanti dhanë gjatë Luftës së Dytë Botërore në strehimin dhe shpëtimin e shumë hebrenjve.
Në fjalën e tij Cohen nxori në pah objektivin më të rëndësishëm të vizitës së tyre, atë të promovimit të Beratit pranë kompanive turistike izraelite. Pjesëmarrësit vlerësuan maksimalisht përpjekjet e bashkisë së Beratit në drejtim të ruajtjes dhe zhvillimit të marrëdhënieve të bashkëpunimit me qytete të tjera në Izrael, siç është edhe rasti i qytetit të Karmielit, me të cilin bashkia e Beratit është binjakëzuar dhe ka nënshkruar disa marrëveshje bashkëpunimi në fushën e kulturës dhe menaxhimit të mbetjeve.