Prej ditësh, pranë Qendrës Spitalore Universitare “Nënë Tereza” krijohet një gjendje kaotike, me trafik automjetesh që qëndrojnë në vend në gati 2 orë.
E gjitha kjo skenë e ndodhur brenda QSUT-së, një ambient që duhej të garantonte lëvizjen e lirë të pacientëve, por edhe të ambulancave që transportojnë të sëmurët në raste urgjence.
Një situatë aspak normale e krijuar për shkak të punimeve që po kryen nga Bashkia për rikonstruksionin e Rrugës së Dibrës, e cila teksa kryhen punimet është bllokuar për qarkullimin e automjeteve.
Kështu, për të dalë nga QSUT-ja pasi të sëmurën janë vizituar atje, apo më keq akoma, për të hyrë në ambientet e brendshme të QSUT për të marrë trajtimin mjekësor, drejtuesve të automjeteve që shoqërojnë të afërmit e tyre të sëmurë, u janë dashur të presin në trafik deri në 2 orë. Ata thonë se punimet në rrugë duhet të kryhen gjatë orëve të natës deri në orët e para të mëngjesit, por jo duke krijuar një situatë të tillë kaotike në mes të ditës.
Ky trafik në ambient spitalor bëhet rrezik serioz për shëndetin e të sëmurëve, e veçanërisht këtë rrezik e ka ndjerë një i sëmurë që po transportohej me autombulancë.
E bllokuar në mes të trafikut ambulanca është vonuar për të mbërritur në ambientet e QSUT në mënyrë që i sëmuri të marrë ndihmën e nevojshme.
“Desh i vdiq në ambulancë”, – shprehet një drejtues i bllokuar në trafikun brenda QSUT-së.
Një tjetër shofer shprehet se e afërmja e tij kaloi gjendje të vështirë duke pritur gjatë në makinë pasi kishte kryer shërbimin e dializës në QSUT.
