Gjykata e Posaçme ka vlerësuar masat e sigurisë për 32 personat, të cilët akuzohen nga SPAK se janë përfshirë në trafikimin e emigrantëve në kuadër të një grupi të strukturuar kriminal.
Në burg janë lënë 24 persona, ndërsa 7 të tjerë në arrest shtëpie, 1 me detyrim paraqitje, ndërkohë që pesë janë ende në kërkim nga policia.
GJKKO ndryshoi masat vetëm për 3 të arrestuar. Për një grua me fëmijë 3 muajshe, prokurorja e çështjes Elida Celami kërkoi zëvëndësim mase nga ‘arrest në burg’, në ‘arrest shtëpie’. Ndërkohë që zëvëndësim mase ka pasur edhe për Arnold Shahun, nga arrest në bug në arrest shtëpie.
Sakaq, një tjetër zëvëndësim mase u dha për një shtetas tjetër nga arresti shtëpiak në ‘detyrim paraqitje’.
Të 37 masat e sigurisë u firmosur nga GJKKO, me kërkesë të SPAK, që e mori dosjen në dorëzim nga prokuroria e Tiranës për moskompetencë, edhe pse hetimet kishin nisur që në vitin 2020. Për të zbardhur aktivitetin e grupit, dhe personat e përfshirë në të, Report Tv ka mësuar se SPAK ka infiltruar një agjent në mesin e tyre, i cili u ka kërkuar trafikantëve që të kalonte drejt Britanisë së Madhe.
Organizator kryesor, i të gjithë rrjetit mësohet se është Bashkim Sula. Ndërkohë, Njazi Ademaj, po ashtu i arrestuar, kishte rol për gjetjen e qytetarëve që u duheshin dokumente false.
Për sa i përket Xhelal Krasniqit sipas hetimeve rezulton se është personi që në Kosovë kishte ngritur laboratorin për falsifikimn e dokumenteve.
Ndërkohë një laborator i ngjashëm por më i vogël ishte në Tiranë, ku sipas hetimeve pas tij qëndron Ylli Brahimaj, një tjetër i arrestuar nga Policia e Tiranës.
Ka qënë agjenti që ka treguar të gjithë rrugën nga Shqipëria në Spanjë dhe më pas drejt Britanisë. Ka pasur komunikime lidhur me mënyrën e transportit nga shoferë dhe të punësuar të tjerë në dy agjenci turistike.
Pagesat shkonin nga 3 mijë deri në 20 mijë euro dhe bëheshin pasi mbërrinim në destinacionet finale. Mësohet se janë mbi 40 persona që janë ndihmuar qe të kalojnë në vende si Britania e Madhe, Kanadaja apo edhe ShBA.
Kryesisht falsifikoheshin dokumente Italiane, Rumune apo edhe Bullgare e Sllovene. Në këtë grup është e dyshuar edhe një avokate e cila udhëzonte shtetasit shqiptarë si ata të aplikonin për vizë kanadeze, ajo është nën masën arrest shtëpiak. Gjithashtu i përfshirë është edhe një polic i komisariatit nr. 5.
