Deputetët e opozitës iu përgjigjën kryeministrit Edi Rama pas deklaratave të tij që tha se jeni “afektuar me budallëkun”.
Deputeti Edmond Spaho theksoi se deklaratat e Ramës janë pa argumente dhe ia kalojnë Gim Gjuzit që shiti minaren e Tiranës.
“A dëgjuat ndonjë argument, veçse fjalëve? Ia kalon edhe Gim Gjuzit që ka shit edhe minaren e Tiranës. Është tipik i trevave arbërore. E dini ju thotë se kush është fondacioni shqiptaro-amerikan. Bota ka filluar me këtë. E dimë shumë mirë, është krijuar në ’93-in. Kam qenë një nga përfaqësuesit e palës shqiptare në atë fondacion. Nuk kanë lënë gurë pa lëvizur dhe ne kishim partner stratejgik BERZH-in dhe ai na tha jo, sepse s’është për ju’, tha Spaho.
Gjuha e përdorur nga kryeministri është e pa pranueshme për kreun e grupit parlamentar të PD, Enkelejd Alibeaj. Ai kërkoi që sipas rregullores, kryeministri të sanksionohet nga kryetarja e Kuvendit.
“Tha 13 herë fjalën budalla, i budallenjve, kopeja dhe me radhë. Ndjej keqardhje për gjendjen mendore të tij, por në parlament ka një kod sjellje. Në nenin 6 thuhet që duhet sanksionuar deputeti që përdor gjuhë jo parlamentare dhe sapo ndodhi. Duhet sanksionuar nga ju, për të vendosur seriozitetin në këtë sallë. Për historinë e budallenjve apo të hajdutëve mund të jenë shumë të rinj që në kohën kur zotëria ishte Ministër Kulture ka një të dhënë, ikonat, që ai çoi në Gjermani dhe që s’u kthyen kurrë”, tha Alibeaj.
