Reagimi i fortë i ambasadës amerikane që dënonte dhunën, duket se nuk është pritur mirë nga forcat opozitare të cilat kanë angazhuar strukturat për të nisur një sulm virtual drejt saj.
Në mjaft komente, militantë të saj janë përpjekur të denigrojnë figurat e diplomacisë amerikane duke i kërkuar që të mos mbështesnin qeverinë “Rama” por opozitën “Basha”.
Ndërkohë, ambasada amerikane bëri të qartë qëndrimin e saj që mbështet datën e zgjedhjeve dhe dënon dhunën e opozitës.
“🇦🇱Shtetet e Bashkuara duan atë që meriton populli shqiptar: sundim të ligjit që mbron punonjësit civilë dhe shkollat nga sulmet e pakuptimta, që mbron integritetin dhe sigurinë e procesit zgjedhor, dhe që mban premtimin e së drejtës së qytetarit për të protestuar paqësisht ndëkohë që bën që ata që përfshihen në dhunë të mbajnë përgjegjësi.
Nxisim të gjithë qytetarët dhe të gjitha institucionet kudo në Shqipëri që të mbështesin parimet e sundimit të ligjit, të refuzojnë dhunën në të gjitha format e saj, si dhe të ushtrojnë paqësisht të drejtat e tyre demokratike ndërkohë që lejojnë bashkëqytetarët e tyre të bëjnë të njëjtën gjë.
Po ashtu, iu bëjmë thirrje organizatorëve të protestës së nesërme që të mbajnë përgjegjësi përballë po të njëjtave parime, t’iu bëjnë thirrje publikisht mbështetësve të tyre të mblidhen paqësisht si dhe të refuzojnë energjikisht dhunën në çdo mundësi”, nënvizonte ambasada. (TemA)