Spitali Universitar “Shefqet Ndroqi”, ka reaguar pas denoncimit të bërë nga Partia Demokratike, e cila përmes ish-deputetit Bardh Spahia, ka akuzuar qeverinë dhe spitalet se nuk kanë ilaçe për pacientët me Covid.
Në një deklaratë për media, spitali Covid2, “Shefqet Ndroqi” thotë se nuk mungon asnjë medikament apo trajtim. Më tej, thuhet se Covid2, ka marrë të gjitha masat e nevojshme për t’u kujdesur për të gjithë pacientët, me terapitë e plota të mjekimit.
“Në përgjigje të reagimit të Partisë Demokratike, Spitali Universitar “Shefqet Ndroqi” informon qytetarët se nuk mungon asnjë medikament apo trajtim për pacientët e shtruar që përdoret në protokollet e përcaktuara të mjekimit në spitalin tonë. Spitali Covid2 “Shefqet Ndroqi” ka marrë të gjitha masat e nevojshme për t’u kujdesur për të gjithë pacientët, me terapitë e plota të mjekimit. Në të njëjtën kohë ftojmë politikanët të na lejojnë të bëjmë punën tonë për t’u shërbyer pacientëve të prekur nga Covid19 ditë e natë, pa ndërprerje, me përkushtim dhe profesionalizëm”, shkruhet në reagim.
Ndërkaq u bën thirrje politikanëve, t’i lejojnë të bëjnë punën për t’u shërbyer pacientëve të prekur nga Covid19 ditë e natë.