Kryetarja e LSI-së, Monika Kryemadhi, ka publikuar fakte të tjera në lidhje me abuzimet në Inceneratorin e Fierit.
Ajo ka nxjerrë me emra dhe foto pronarët e kompanive që sipas saj janë krijuar me qëllimin e vetëm për të realizuar evazionin financiar, pasi kanë realizuar skema për fryrje kostosh dhe rimbursim TVSH-je.
Kryemadhi thotë se pagesat për inceneratorët duhet të kishin ndaluar prej kohësh dhe inceneratori i Fierit duhej të ishte nën sekuestro preventive, ndërsa inkurajon SPAK të shohë paditë dhe faktet e paraqitura, për t’i vendosur para drejtësisë të gjithë përgjegjësit.
Postimi i Monika Kryemadhit:
Ja “veprat” e Edi Ramës, që qytetarët ta kuptojnë se ku ikin paratë e tyre!
Nga 31 miliard lekë, që qeveria i ka dhënë inceneratorit të Fierit deri në Dhjetor 2021, 2,1 miliard lekë, rezultojnë të jenë implikuar në një skemë krimi financiar.
Këto janë faturat tatimore me data, se si Inceneratori Fier ka realizuar skema për fryrje kostosh dhe rimbursim TVSH-je.
Kompanitë janë krijuar me qëllimin e vetëm për të realizuar evazionin financiar, ato kanë nga 2 punojës, të regjistruar fiktivisht, nuk kanë mjete, si dhe rezultojnë pa liçensa.
Pagesat për Inceneratorin e Fierit duhet të kishin ndaluar prej kohësh dhe duhej të ishte nën sekuestro preventive.
Ndërkohë që do vijojmë të bëjmë publike, pa kompromis, faktet tronditëse të aferës së 3 inceneratorëve, inkurajojmë prokurorët e SPAK, të shohin paditë dhe faktet e paraqitura, për t’i vendosur para drejtësisë të gjithë përgjegjësit!
