Presidenti i Serbisë, Aleksandar Vuçiç është shprehur se për Kosovën nuk ka zgjidhje tjetër veç arritjes së një marrëveshje. Sipas tij, marrëveshja do të pranohet nga serbët dhe shqiptarët sepse ajo sjell paqe.
E nga këtu lind pyetja, përse serbëve, iu deshën 630 vjet për ta kuptuar!
Që nga 28 qershori i 1389, kur koalicioni i princërve ballkanikë humbi përballë ushtrisë Osmane, serbët e kanë festuar humbjen e betejës së Fushë Kosovës, si fitore. I fundit ishte Millosheviçi, më 28 qershor 1989, në 600 vjetorin e kësaj beteje, kur në “Gazimestan” mbajti fjalimin kundër shqiptarëve përpara 2 milionë serbëve. Nga aty nisi ngjitja e tij e pandalshme në majën e pushtetit në Beograd dhe shpërbërja e ish Jugosllavisë. Sot jemi në 2019, plot 30 vjet më pas dhe Presidenti i Serbisë, më në fund paska kuptuar se nëse nuk bëjnë kompromis me shqiptarët do të pësojnë tragjedinë më të madhe dhe humbjen më të keqe që kanë pësuar ndonjëherë në histori! Pse duheshin 630 vjet për ta kuptuar këtë? Më mirë vonë, se kurrë:
“E vërteta është se Kosova nuk është e gjitha shqiptare dhe e vërteta është se Kosova nuk është e gjitha serbe dhe e vërteta është se ne kemi nevojë për të arritur një kompromis. Ai që nuk e kupton këtë do të futë Serbinë në tragjedinë më të madhe nga të cilat ne do të dalim të mposhtur, do të pësojmë humbjen më të keqe se kurrë më parë”- thotë ndër të tjera Aleksandër Vuçiç, duke shtuar se ”nuk do ta çonte Serbinë në luftëra dhe konflikte nga të cilat nuk mund të dilnin si fitues”.
