Ish-kryebashkiaku i Bilishtit, Blejdon Nallbati ka reaguar pas akuzave të ngritura nga Deizi Arapi, se ai mund të jetë pas vendosjes së zjarrit në makinën e saj gjatë mbrëmjes së djeshme.
Nallbati, aktualisht deputet i Partisë Demokratike, ka deklaruar se me Arapin ai ka pasur vetëm një konflikt verbal në të kaluarën, ndërsa shton se do e padisë për shpifje.
“Jam i habitur nga këto akuza. Unë kam pasur vetëm një konflikt verbal kur isha kryebashkiak, por asgjë më tepër. Besoj se është nxitur nga dikush tjetër për të bërë këto akuza. Sa i përket punëtorit tim nuk mbaj përgjegjësi për çdo punëtor që kam, me kë zihen dhe çfarë bëjnë. Sapo të kthehem nga Gjermani do të bëj një kallëzim për shpifje.” – shprehet ai.
Arapi më herët akuzoi Nallbanin se mund të kishte urdhëruar djegien e makinës së saj për shkak të një konflikti të vjetër që kishte nisur pasi nëna e saj ishte pushuar padrejtësisht nga puna si pastruese.
Sipas saj, 4 vite më parë ajo është konfliktuar me ish-kryebashkiakun e Bledion Nallbati, për shkak se nëna e saj ishte pushuar nga puna si pastruese padrejtësisht.
“I kërkoj ndihmë shtetit pasi është hera e dytë që më ndodh dhe ka lidhje me një konflikt të vjetër. 4 vite më parë mamaja ime është pushuar nga puna si pastruese padrejtësisht dhe unë jam konfliktuar me ish kryebashkiakun Bledion Nallbati ( aktualisht deputet). Pas konfliktit mu dogj makina e parë. Dje gjatë gjithë ditës më ka ndjekur një person me të cilin dhe kam shkëmbyer fjalë mbrëmë. Ai është punonjës i karburantit në pronësi të Bledion Nallbatit. Në vendngjarje është gjetur një bidon benzine nga ky karburant ashtu si herën e kaluar. Djegien e makinës së parë policia e konsideroi aksidentale por ja qe ngjarja po përsëritet. Nëse nuk merren masa nuk është çudi që unë të përfundoj në ndonjë kanal”, tha ajo.
