Deklaratat e presidentit të Kosovës Hashim Thaçi për “korrigjimin e kufijve” me Serbinë kanë sjellë reagime të shumta të faktorit shqiptar por jo vetëm.
Mes të parëve që reaguan ishte edhe ish-kryeminsitri Sali Berisha i cili e kritikoi ashpër idenë e Thaçit. Por, kreu i shtetit të Kosovës iu kundërpërgjigj ashpër.
Edhe pse nuk i përmendi emrin, ai bëri një status në rrjetet sociale duke e akuzuar si personin që “furnizoi me naftë makinerinë e luftës së Millosheviçit, duke thyer embargon e naftës”.
Po ashtu, ai foli edhe për arrestimin e ushtarëve të UÇK në Shqipëri dhe trajtimin e saj si organizatë terroriste.
Lidhur me këtë debat ka dhënë një koment edhe ish-ministri i Jashtëm në kohën e qeverisjes së Berishës, Besnik Mustafai. AI tha se nuk ka informacion për arrestime, por tha se në Shqiëpri janë stërvitur ushtarë të UÇK, madje edhe nga struktura shtetërore.
Por, sa i takon raporteve Berisha-Thaçi, ai shtoi se “Berisha nuk ushqente simpati për Thaçin, këtë mund ta them”.
I ftuar në studion e lajmeve në News24, Mustafaj tha se është më rëndësi që Presidenti Hashim Thaçi ta sqarojë një herë e mirë publikun se si do të procedohet nëse merret një vendim për korrigjim kufijsh.
Po ashtu, ai e konsideroi Serbinë një vend negociator shumë të vështirë.“Thaçi duhet të sqarojë para opinionit publik se si e mendojnë këtë bashkim të territoreve të Preshevës me Kosovën, e dyta nëse ka ndonjë dëmshpërblim për Serbinë, dhe pse përkon me insistimin e ministrit të Jashtëm Daçiç, për rregullimet territoriale.
Ikja nga Kosova e pjesës veriore, është ikje me rëndësi vitale për shtetin e Kosovës, se janë burime ujore atje lart. Kosova thahet nga etja pa ato burime. Ikën pjesë me rëndësi jetike për mbijetesën e Kosovës.
Terreni konkret do e komplikojë punën dhe do ketë kundërshti nga brenda. Do ketë pasoja në nivel ndërkombëtar.
Jam i bindur se përpjekjet që bëhen në këtë drejtim, bëhen për realizimin e një objektivi të shtetit serb prej vitesh.
Nuk kam informacion nëse departamenti i shtetit është dakord me diçka të tillë. Por nëse dy venden bien dakord me mirëkuptim, s’besoj se kundështohet nga ndërkombëtarët,” tha Mustafaj.
