“Inter anti-Juventus? Është shumë shpejt për ta thënë. Teknikisht Inter është e strukturuar mirë, por duhet të rritet dhe Spalletti duhet të punojë mbi mentalitetin. Milan ka bërë një merkato të rëndësishme dhe mund t’ja dalë mbanë mirë. Napoli është i gjithi për t’u verifikuar, sepse është skuadra që ka bërë më pak merkato dhe ka humbur Jorginho”. Ishte kjo analiza shumë e qartë e tre ekipeve pretendente për të sfiduar Juventusin në Seria A për këtë sezon, sipas lupës së ish-trajnerit të kombëtares së Shqipërisë, Gianni De Biasi.
Kujtojmë se De Biasi fitoi vëmendjen e mediave italiane dhe të opinionit sportive në Itali, pas suksesit historik të arritur në drejtimin e kombëtares kuqezi, me kualifikimin për në Kampionatin Europian “Francë 2016”. Një arritje e rëndësishme edhe në planin individual të teknikut italian, i cili u përfol edhe si kandidat potencial për të marrë drejtimin e përfaqësueses së Italisë, post që më pas iu akordua trajnerit Gianpiero Ventura.
